Ekimena Nafarroako Parlamentu Sozialak eta Eskubideen Kartak antolatuta egin da eta datozen bi asteetan aurrekontu sozialen alde Iruñean egingo diren lehen ekintzetakoa izan da. Urriaren 8an argindarraren gehiegizko garestitzearen aurkako mobilizazioa egingo dute Sarasate pasealekuan, 18:00etan, Zuen etekinak, gure iluntasuna goiburupean.

Urriaren 13an eta 15ean jardunaldiak egingo dira aurrekontu sozialen alde, Geltokin. Eta Urriaren 16an manifestazioa egingo da 18:00etan Autobus Geltokitik abiatuta.

2022ko foru aurrekontuak

14ko eta 15eko jardunaldiei begira, Nafarroako Parlamentu Sozialak hainbat datu azpimarratu ditu. Elkartearen esanetan, eta Nafarroako Gobernuak 2022rako azpimarratu dituen datuen arabera, gobernuaren zor jaulkipena 692 milioi eurokoa izango da. Diotenez, UPNko gobernuek sortutako zorraren ordainketara bideratuko da diru hori: Bidearen eta Pirinioetako autobideak, eta Nafarroako Ubidearen itzalpeko bidesarien ordainketara (528 milioi euro) batetik, eta bestetik, Europako Funtsen finantzaziora (164 milioi).

Zorraren 692 milioi hauei gehitu behar zaie, Parlamentu Sozialaren arabera, Espainiako Estatuaren zorraren Nafarroako zatia, 2022an 344 milioi eurokoa aurreikusten dena.

Europako Funtsak nora bideratuko diren ere azpimarratu dute: 4,4 milioi euro Volkswageneko auto elektrikoaren programara eta beste 31 milioi haren faktoria barruko trenbide buklea desegitera; 7,6 milioi Accionaren kudeaketapean izango diren bioerregaien garapenera; 9,3 milioi enpresa pribatuetara, ekonomia digitala sustatzeko; 18 milioi lan merkatua indartzera, “zeintzuen onuradun handienak CEN Nafarroako enpresariak, UGT eta CC.OOO izango diren”.

Zerga erreforma sakonaren beharra

Parlamentu Sozialaren iritziz, gastu horiei aurre egiteko ezinbestekoa dira zerga erreforma sakona eta zerga iruzurraren aurkako borroka. Honako neurriekin halako dirutzak bildu daitezkeela diote: PFEZen igoerarekin goi mailako errenta handientzat eta aberatsentzat, 80 milioi euro; sozietateen gaineko zergan izandako irabazien erregularizazioarekin, 400 milioi euro; NUPek iruzur fiskalaz egindako azterketaren arabera, 541 milioi berreskura daitezke esparru horretan; Parlamentu Sozialak zor bidegabeaz egindako ikerketaren arabera, bankuek 191 milioi euro itzuli beharko liokete Foru Gobernuari.

Parlamentu Sozialak gogoratzen duenez, “dirutza hauek gizartearen onurarako erabil ahal izateko, ezinbestekoa da Aurrekontuen Egonkortasunerako Legea bertan behera uztea, haren arabera, aurrekontuei jarritako gastu sabaia gainditzen duten diru sarrerak ezinbestean bideratu behar baitira zor publikoa ordaintzera, hots, bankuetara eta putre funtsetara”.