Astearte eguerdian, sindikatu eta hezkuntza komunitateko kideek egin zituzten elkarretaratzeak Bilbon, Gasteizen, Donostian, Iruñean eta Tuteran. Arratsaldean, berriz, 178 herritako udaletxeen aurrean antolatu ziren mobilizazioak. Bertan, Israelekiko konplizitate oro haustea exijitu zuten eta gatazkari konponbidea emateko “bide diplomatikoen” beharra nabarmendu zuten. 

Euskal Herriko leku ugari hartu ditu Gernika-Palestina plataformak deitutako herri ekimenak: 63 herri Bizkaian, 41 Gipuzkoan, 61 Nafarroan, hamabi Araban eta bat Lapurdin. Urtebeteko epean, Israelgo armadak gutxienez 43.000 palestinar erail dituela eta Gazako azpiegituren %70 suntsitu dutela salatu dute.

Herri askotan Leire Vargasek idatzitako poema irakurri dute, genozidioari berehalako erantzuna emateko beharra azpimarratu du: 

sarraskia gosetea tortura

alez ale gure hiztegian txertatzen goazen zentzugabekeriak

harik eta gure zentzuzko egunerokotasun normalean paisaiako elementua diren arte

urrutiko paisaia zaratagabea

eta galdetu nahi dut zelan heldu garen honaino baina bada azalpenik

80 urtetako historia koloniala eta bost bat mende aurretik

gutxi batzuen aberastasuna askoren minaren lepotik

mendebaldea ekialdeaz bazkatzen beste behin

eta zergatik ez

zertan eztabaidatu egingo genukeen moduan jokozelaia malkar bat ez balitz

Irakurri osoa hemen.