Azaldu duenez, urte batzuez ETAko militante izanak eta preso eman zituen urteek “indar handia” eman zioten Otegiri ondoren ezker abertzaleko lidergo politikoa eskuratzeko. ETAtik eta kartzelatik igaro ostean aldaketa ideologiko nabarmena izan zuen Batistaren aburuz, biolentzia “ezbaian” jartzera igaroz.

“Armak isilarazteko beharra oso azkar barneratu zuen. Biolentzia utzi eta bakearen bideari ekiteak independentismoa gauzatzeko aukera erreala zekarren. Gainera, bakeari balio etikoa ere ematen zion”.

Otegi estatu mailako lidertzat jotzen du Batistak. “Arnaldo ez da tokiko liderra, askoz gehiago da. Hizketarako erraztasuna dauka. Paperik gabe hitz egin dezake. Jendea intelektualki seduzitzen du”.

Bere ustez, ez da soilik ezker independentismoaren liderra; “euskal abertzaletasun osoarena” ere bada. Horren adibide gisa aipatu du behin EAJko goi kargudun batek esan izana Otegi zerrendaburu edukita hauteskundeetan gehiengo absolutua lortuko luketela. “Bere eragina ezker abertzaleaz gaindi doa”.

“Estatuak ETAren mamua behar du, horregatik dago Otegi preso”

Batistak esplikatu duenez, Estatuak ez du ETAren biolentziarik nahi; bai ordea, independentismoa kriminalizatzea ahalbidetzen duen “ETAren mamua”. Horregatik ei dago Otegi kartzelan. Gaineratu duenez, PPren gobernuak bere esku dagoen guztia egingo du ezker abertzaleko liderra 2022arte inabilitatzeko.

“Espainiako Estatuarentzat sekulako kolpea litzateke Arnaldo hauteskundeetara aurkeztu ahal izatea, irabazteko aukera asko izango bailituzke”.

Otegi kartzelara bidali zuen sententziari dagokionez, Batistak dio epaileak kartzelaratzea agintzeko darabiltzan argudioek berdin-berdin balio zezaketela bakearen eta giza eskubideen sari bat emateko.

“Otegik bakea gauzatzea baino ez zuen egin. Bere kartzelaratzea independentismoaren kriminalizazioaren erakusle gorena da”.