Animalien askapenaren aldeko mugimendu antolatuaren historiaz eta garapenaz mintzo dira hamabi ekintzaile antiespezista dokumentalean. Nor taldeak sortu du lana eta ostiralean ARGIAn izango da osorik ikusgai.
Europako testuinguruan jarrita, Euskal Herriko mugimendu antiespezistaren garapena aztertu nahi izan dute Lorratzean dokumentalean.
Mugimendu antiespezistak bide propioa egin du Euskal Herrian herriz herri sortutako taldeen eskutik. Talde horietako hamabi ekintzailek hartu dute hitza dokumentalean, beren esperientziak eta hausnarketak partekatzeko. Nor taldeko kide Edurne Elizondok azpimarratu duenez, aipagai izan dute mugimenduak Bilbon egindako bidea; 2010ean Donostian sortutako Askekintzak beste talde eta pertsona askorengan izan duen eragina nabarmendu dute; eta salatu dute 2011n Galiziako epaile batek mugimenduaren aurka abian jarritako operazioa. Errepresioak zuzenean jo zuen Euskal Herria, lau ekintzaile atxilotu baitzituzten, Bilbon. Auzia, azkenean, artxibatu zuten.
Urrian Gasteizen estreinatu zuten dokumentala eta herriz herri emanaldiak antolatu eta gero, ostiraletik aurrera ARGIA.eus-en izango da ikusgai.