Udara honetan turismo kanpaina berraktibatzeko asmotan prestatu du Bruselak Ziurtagiri Berde digitala deiturikoa, Europar Batasuneko herrialdeen artean bidaiatzea erraztuko duen ziurtagiria. Txertaketa-bidezko immunitatea ziurtatzeaz gain, PCR test negatiboa edo antigorputzak izatea ere kontuan hartuko ditu.

Agiria doakoa izango da eta digitalki zein paperean emango da, bi kasuetan QR-kode bat izango du irakurgailu batekin EBko edozein herrialdeetan baliozkotasuna egiaztatu dezaten. Bruselak Sendagaien Europako Agentziak onartutako txertoak hartuko ditu kontuan -Pfizer, Moderna, AstraZeneca eta Janssen- baina estatu bakoitzak beste txerto batzuk onartzeko aukera ere egongo da.

Ursula Von der Leyenek asteartean aurkeztu zuen agiriaren proposamena: "Estatu kideei mugitzeko askatasuna modu seguru, arduratsu eta fidagarrian berrezartzen lagundu nahi diegu". Batzordeko arduradunen esanetan, agiriak ez du diskriminaziorik eragingo bidaiari eta turisten artean txertatzea ez delako beharrezkoa izango eta PCR testa egitea nahiko izango delako. "Gure helburu nagusia erabiltzen erraza den tresna bat eskaintzea da, ez-diskriminatzailea eta segurua, datuen babesa erabat errespetatzen duena", adierazi du Vera Jourová Baloreen eta Gardentasunaren presidenteordeak.

Hala ere, EBko kide diren estatuen eta Europako Parlamentuaren oniritzia jaso beharko du proposamenak. Bruselaren asmoa ekainerako ziurtagiria prest egotea da.

Iritzi kontrajarriak

Espainia, Grezia eta Austriaren kasuan erabakia txalotu dute, ekonomia eta turismoa berraktibatzeko funtsezkoa dela adierazi baitute. Baina proposamenak zalantzak ere sortu ditu zenbait herrialdeetan, esaterako, Frantzian, Belgikan, Alemanian eta Herbeheretan. Angela Merkel Alemaniako kantzilerrak "arriskutsutzat" jo du turismoa berraktibatzea eta Espainiako Osasun Publikoko Elkarteak ere itxoiteko eskatu du.

Bestetik, Andre Ammon Gaixotasunen Prebentzio eta Kontroleko Europako Zentroko zuzendariak errefusatu egin du proposamena txertorik hartu ez duten pertsonak diskriminatzeagatik eta immunizatuek birusa transmititzeko moduari buruzko ebidentzia zientifikorik ez izateagatik. ECDCko zuzendariak, hala ere, PCR testa eta gaixotasuna gainditu izana kontuan hartzea positibotzat jo du, baina ez Schengen eremutik bidaiatu ahal izateko "tiket libre" gisa erabiltzea, eta zalantzan jartzen du, halaber, osasun-pasaporteak koronabirusarekin infektatutako pertsonen jarraipenean lagundu dezakeen.