Negu “epela” izan dela ondorioztatu du JRC Ikerketa Zentro Bateratuak, eta kezka azaldu du datozen hilabeteetarako. Europa hegoaldean lehortea aurreikusi dute udarako, eta ur eskasia nahiz ekoizpen galera eragin lezake.
Lehorte arriskuaz ohartarazi du Europako Batzordeko JRC Ikerketa Zentro Bateratuak, astelehenean aurkeztutako txostenean. Udaberrian egin dezakeen euria “erabakigarria” izango da ur eskasiari aurre egiteko, batik bat Europa hegoaldeko lurraldeetan, azterlanaren arabera.
Ohikoa ez den negu “epel eta lehorra” izan dela ohartarazi du JRCk, eta ondorioz lurraren hezetasuna oso txikia dela: “Prezipitazioak behar dira, berehala”. Kezka azaldu du udan egon daitekeen ur eskasiari dagokionez, batezbestekoa baino udaberri beroagoa aurreikusi dutelako Europa osorako. “Beharrezkoak izango dira zaintza zorrotza eta uraren erabilerarako plan egokiak, baliabide hidrikoei begira kritikoa izan daitekeelako datorren denboraldia”, jakinarazi dute ikerlariek.
Eremu hauetan dago lehorte arrisku handiena: Espainia hegoaldea, Frantzia, Irlanda, Erresuma Batua, Italia iparraldea, Suitza, Mediterraneoko irla gehienak, Errumania eta Bulgaria, besteak beste. Lurralde horietako nekazaritza ekoizpena “baldintza onetan” dagoela ondorioztatu dute, baina ur kantitate handiagoak beharko dituztela datozen hilabeteetan, ekoizpenak aurrera egin dezan. Erabakigarria izango da udaberriko eguraldia, iazkoa bezalako uda bero eta lehorra etor daitekeelako, JRCren kalkuluen arabera.
