Eneritz Basurko euskara zinegotziak azaldu duenez, herriko Euskara Plana garatzerakoan argi ikusi zuten esaera-bildumak erabiltzaileen eskura ipini behar zirela. “Egitasmoa eta aplikazioa bera horrexetara datoz: gure berbak eta esaerak plazara atera, gazteengana iritsi eta teknologia berriak erabili”, gaineratu du.

Aplikazioak 600dik gora esaera eta hitz berezi biltzen ditu, grabazio formatuan. Bilketa lanean Radixu irratia, ondarruberbetan eta ondarrutar naturala atarien laguntza izan dute, “baina batez ere herritarren ekarpena izan da gakoa”. Udan 70 herritar baino gehiagok hartu zuten parte Radixu Irratian eginiko grabaketetan. “Gazte nahiz heldu, bakoitzak bere doinua ipiniaz, izugarri aberastu da aplikazioa” nabarmendu dute egitasmoaren sortzaileek.

Aplikazioa deskargatu eta erabiltzeko gonbitea luzatu die Udalak herritarrei, esanez aukera ederra dela “ondo pasatu, eta bide batez, zerbait ikasteko”. “Ez da entretenimendu hutsa, hori baino askoz gehiago da; izan ere, gure berbetari balio handiagoa emango diogu erabiltzen dugun bakoitzean”, azpimarratu du Basurkok. Behin erabiltzen hasita, aukera dago esaera eta hitzak sare sozialen bidez partekatzeko.

“Ahuakemonala” kanpainari amaiera emateko, herritarrek herri hizkeraren inguruko lehiaketa batean parte hartzeko abagunea izango dute. Udala ari da prestatzen, eta euskararen egunean abiatzea aurreikusten da.

Aplikazioa ondorengo helbidean eskuratu daiteke, musu truk: https://play.google.com/store/apps/details?id=eus.iametza.ahuakemonala

Ondarruko esaeretan oinarritutako hainbat meme ere agertu da sarean: