Snowdenekin eskuz esku lan egin zuen Glen Greenwald kazetariak eman du albistea The Intercept agerkarian. 2010ean Obama presidenteak CIAri agindua eman zion AEBetako herritar bat Yemenen hiltzeko: Anwar al-Awlaki, Al Qaedako buruzagietako bat zelakoan, nahiz eta al-Awaki sekula ez zen akusatua izan inongo delitu edo krimenengatik, ezta zigortua izan ere. Halere, inteligentzia zerbitzuek "ondo" bete zuten lana eta agindua eman eta urtebete geroago 2011ko irailean drone bitartez hil zuten. Hilketa horrek eztabaida handia eragin zuen AEBetan, baina handik bi astetara drone bitartez egindako beste eraso bat isilpean geratu zen, nahiz eta adin txikikoak tartean izan. CIAren beste drone eraso batek Awlakiren 16 urteko semea, Abdulrahman, 17 urteko lehengusua eta beste hainbat zibil hil zituen.

AEBetako Gobernuak onartu zuen Abdulrahman ez zela erasoaren helburua, "albo kaltea" izan zela. Obamaren prentsa idazkari Robert Gibbs argiago mintzatu zen Colorado estatuan jaiotako nerabearen hilketaz: "Hobe zuen aita arduratsuago bat izan".

Trumpek lekukoa hartuta

Urtarrilaren 29an ustez Al-Qaedak Yemenen dituen buruzagien aurkako beste eraso bat egin zuen AEBetako armadak. Hasiera batean militar estatubatuarrek zibilik ez zela zauritu adierazi zuten, baita CNN kateak bertsio hori berretsi ere. Halere, ordu gutxiren buruan bertsio ofiziala gezurtatu duen informazioa helarazten hasi ziren Yemendik: "Erasoan 30 lagun hil dituzte, tartean hamar emakume eta ume". Ondoren baieztatu ahal izan denez, Trumpek agindutako erasoan hildakoen artean 8 urteko Nawar al-Awlaki umea dago, 2011ko erasoetan hildako Anwar al-Awlakiren alaba eta Abdulrahman al-Awlakiren arreba. Jeremy Scahill kazetariak adierazi duenez, lepoan tiroa emanda odolustuta hil da.

The New York Times egunkariak otsailaren 9ean azaldu zuen eraso hori hainbat hilabetez planeatu eta eztabaidatu zutela Obamaren agintaldian, baina haren ofizialek erabaki zutela erasoa atzeratu eta erabakia presidente berriaren esku uztea. Terroristak ez ezik beren senideak ere jazartzeko prest dagoela behin baino gehiagotan adierazi zuen Donald Trumpek hauteskunde kanpainan. Bere hitza bete du.

Glen Greenwald kazetariak azpimarratzen duenez, agian hilketa hauen alderik lazgarriena da Al Qaedak oso presentzia txikia duela Yemenen, Obamaren administrazioak bonbardaketen eta drone bitartezko erasoen bitartez zibilak hiltzen hasi zenetik.

Yemen: AEBetako sarbidea ukatua duen zazpi herrialdeetako bat

Botere politikoa eskuratu eta gutxira, Donald Trumpek hartu dituen lehen erabakietako bat izan da AEBetara sartzeko debekua ezartzea Irak, Siria, Iran, Libia, Somalia, Sudan eta Yemengo pertsonei. Zazpi herrialdeetatik bost, bakarrik ala aliatuen laguntzaz, AEBek bonbardatutako herriak dira, tartean Yemen.

Yemenen –munduko herrialderik pobreenetako baten– aurkako bonbardaketak Obamaren administrazioak eta Britania Handiko orduko gobernuak abiatu zituzten, Saudi Arabia aliatu hartuta. Obamak Bake Nobel Saria irabazi (2009ko abenduan) eta aste gutxitara barreiatze-bonba batek 35 yemendar hil zituen –hainbat ume tartean–. Obamaren agintaldian Yemenen aurkako jazarpen militarra areagotu besterik ez da egin urtetik urtera.

Drone bidezko erasoen erabilera Obamaren agintaldiko ezaugarrietako bat izan da eta hala, munduaren historian drone bitartez pertsona gehien hil duen agintaria bilakatu da Barack Obama. Konparaziorako, George Bushek 50 drone-eraso agindu zituen; Barack Obamak 500eko muga aise gainditu du.