Elizondoko liburutegian 19:00etan hasiko da aste beltza. Webgune baten aurkezpena izango da asteleheneko egitarauko plater nagusia: (H)ilbeltza beltzaz du izena eta bertan nobela beltzari buruzko hainbat gai landuko dira, formatu ugaritan. Antolatzaileen esanetan, jende ugari ari da proiektuan parte hartzen, idazle, editore, kritikari, itzultzaile, kazetari, bertsolari, aurkezle… “Arras kontent gaude jasotako erantzunarekin. Nobela beltz zale anitz da gure artean!”.

Asteartean Arizkungo Medikuaren Etxean elkartuko dira, Xabier eta Martin Etxeberria anaien Gizon gogorraren sekretua (Elkar) liburuari buruz hitz egitera.

Jose Antonio Loidi, Hamabost egun Urgainen euskal eleberri poliziako klasikoaren egilea izango da protagonista ostegunean, Angelita arrebaren begietatik eskainiko den solasaldian. Iruritako Jauregiarten da zita, 19:00etan.

Generoarekin zaletasun berezia duen idazle baten txanda ostiralean: Harkaitz Canok Akabaila beltzak zineman solasaldia eskainiko du Arizkunenean 19:00etan.

Delitu handienak asteburuan

Itxaron, itxaron, bala batzuk gorde dituzte-eta errekamaran astebururako. Larunbata: Xabier Olarra eta Miel A. Elustondo buruz buru 11etatik aurrera Arizkunenean Beltzean beltz… eta Jim Thompson izenburua paratu dioten mahai-inguruan. 14:00etan bazkaria Erlategi elkartean (txartela eskatzeko helbidea: ilbeltzabaztanen@gmail.com).

Oturuntzaren ostean eta elkartean bertan, 16:00etatik aurrera Jon Alonsok Beltzaren koloreak (Susa) liburua aurkeztuko du, hain zuzen iazko Euskal Nobela Beltzaren Astean eskaini zuen hitzalditik abiatu den proiektua. Jon Arretxek Estolda jolasak (Erein) liburuaren berri emango du ondoren eta Gotzon Barandiaranek berriz Gidariaren okerra (Susa) nobelarena.

Arratsaldea borobiltzeko, Koldo Almandozen Columba palumbus film laburra eskainiko dute.

Iluntzearekin jarduera deliktiboentzat giro aproposa izango denez, “Susmagarrien gaua” antolatu dute Jauregiarten.

Biharamunean, bukatzeko, Erratzuko plazatik “Kronika beltz baten itzulixka” abiatuko da. 14:00etan pikinika egingo dute Erratzuko Lixutegian eta 19:00etan irakurraldi musikatua Idoia eta Mikelekin Jauregiarten.