Ebola gogor agertzen ari da Kongoko Errepublika Demokratikoan, eta bere historiako kasu gehienak neurtu ditu Munduko Osasun Erakundeak (MOE). Atera duten azken txostenaren arabera, 2018ko abuztutik aurtengo uztailaren 14a arte 2.501 kasu zenbatu ziren; horietatik 2.407 baieztatu ziren, eta gainontzekoak frogatzeke daude. 1.668 pertsona hil ziren birus hau dela eta.

Tedros Adhanom Ghebreyesus MOEren zuzendariak prentsaurrekoan adierazi duenez, Kongo laguntzeko unea da: “Munduak kasu hau gogoan hartu eta esfortzuak handitzeko unea da. Kongoko Errepublika Demokratikoarekin elkartasunean lan egin behar dugu, berpizte honi aurre egin eta osasun sistema hobe bat sortzeko”.

Goma hiria Ruandatik 20 kilometrora eta epidemiaren epizentrotik 350 kilometrora dago, urrun. Hau dela eta, Ghebreyesusek gehitu du Erdialdeko Afrikan birusaren zabaltzearen arriskua altua dela, nahiz eta eskualdetik kanpo transmisio arriskua baxua izan.

Ez mugatzea eskatu dute

Merkataritza harremanak eta bidaia komertzialak mugatzeak kalte egin dezaketenaren ustean, MOEak inolako mugarik ez jartzea eskatu du. Izan ere, mugetako fluxua oztopatu ezkero, jendeak ezohiko bideak hartuko lituzke herrialde batetik bestera igarotzeko, eta horrek birusa urrunago zabaltzea eragin dezakeela azpimarratu dute.

Kongo beti izan da baliabide oparoko eskualdea: koltana, kobaltoa, uranioa… Mendebaldeko potentzientzat historikoki izan da gerra-industriarako eta teknologia-industriarako lehengaiak lortzeko lekua. Bigarren Mundu Gerrarako lehengai asko lortzen zituzten bertatik potentziek, eta ordutik aurrera, beti egon da enpresa multinazionalen menpe. Gerra Hotzaren garaian, mundu unipolarrean… Nahiz eta munduan baliabide gehienetarikoak dituen herrialdea izan, Kongoko Errepublika Demokratikoa –lehen Zaireko Errepublika zena– munduko herrialde txiroenetarikoa da, eta gerrak, ustelkeria eta espoliazioa eguneroko ogia izan da bere historia guztian zehar.