Herri agintaritzetatik bakea eraikiz izeneko bake jardunaldiak egingo dira Donostian urriaren 10ean eta 11n. Hiroshiman egin den Bakearen Aldeko Alkateen batzarrean aurkeztu du egitasmoa Juan Karlos Izagirre Gipuzkoako hiriburuko alkateak, nazioarteko alkate eta udal ordezkariak konferentzian parte hartzera gonbidatzearekin batera.
Izagirreren hitzetan, jardunaldiek “ekarpen garrantzitsua” egingo diote Euskal Herriko bake prozesuari. Dioenez, “inspirazio iturri” izango da jada martxan dauden egitasmoentzat. Donostiako Udalak antolatu duen ekimenak gatazken konponbidean adituak eta bakegintza jorratu duten udal ordezkariak bilduko ditu, haien lanak azal ditzaten.
Jardunaldiak Kursaal jauregian eta Aieteko Bakearen Etxean egingo dira. Iñigo Urkullu lehendakariak eta Martin Garitano Gipuzkoako ahaldun nagusiak izango dute gonbidatuei harrera egin eta konferentziari hasiera emateko ardura.
Bakearen Aldeko Alkateak
Hiroshiman bildu berri den Bakearen Aldeko Alkateen batzarra 5.712 udaletako ordezkariek osatzen dute. Donostiaz gain, Gernika, Muskiz eta Abantoko udalak ere sarearen parte dira. Lau urtean behin antolatzen den batzarraren aurtengo edizioan, Ban Ki Moon Nazio Batuen Erakundeko idazkari nagusia eta Oliver Stone zine zuzendaria izan dira Hiroshiman, mundu osoko udal ordezkariekin batera.