Arlo soziala, juridikoa, hezkuntzakoa eta psikologikoa lantzen dute bertan eta arreta hau jasotzeko ez da beharrezkoa salaketa jartzea. Emakumearen egoera administratiboa edozein dela ere, artatu egiten da.

Nafarroako Gobernuak jakitera eman duenez, zerbitzua jaso duten emakumeen %99k dio asko hobetu dela bere egoera artatua izan ostean eta beste emakumeei gomendatzen diela zerbitzua.

Aurreko urteetako bilakaera

2020an 739 emakumeri eman zioten zerbitzu hauek arreta, 2019an 1.060ri eta 2018an 963ri. Nafarroako Berdintasunerako Institutuko kudeatzaile den Eva Isturizek azaldu duenez, "pandemiak eragin zuen emakume gutxiago gerturatu ahal izatea talde hauetara, nahiz eta uneorko telefono bidezko arreta eman genuen".

Alde anitzak lantzen dituzten zerbitzu hauek 2010eko hamarkadan jarri zituen Nafarroako Gobernuak martxan, eta urtean 1.000 inguru emakumeri ematen diote arreta. Hauei gehitu behar zaizkie Iruñeko Biktimen Arretarako Bulegoak urtean artatzen dituen 300 inguru emakume.

Aterpe zerbitzuak ere gora

Biktimei aterpe emateko zerbitzuak ere gehiago erabili dira aurten: urtarriletik irailera 221 pertsonak hartu du ostatu larrialdi, aterpetzeko etxe eta erresidentzia pisuetan, aurreko urtean baino %30 gehiagok.

Salaketak ere gora

Poliziaren aurrean jarritako salaketak hazi egin dira 2015etik. Urte horretan 1010 jaso ziren, 2019an 1.335, 2020an 1.549 (%16 gehiago) eta aurten urte hasieratik iraila arte 1.213, ia aurreko urtean epe berean jaso zirenen parean (1.203 jaso ziren iaz). Jarritako salaketen %75 indarkeria fisiko edo psikologikoagatik dira eta kasuen %71n erasotzaileak 30 urte baino gehiago ditu.