Petronor enpresa egiten ari den urbanizazio-obra bat geldiarazteko dekretua sinatu du Muskizeko alkate Edu Brionesek. Proiektua instalazioen sarrera hobetzeko lan batzuk dira, besteak beste, espaloi berria eta aparkalekuak enpresa inguratzen duen kanpoko bidean.

Deiak jaso duenez, Brionesek adierazi du Petronorrek iazko urrian obrak egiteko lizentzia-eskaera aurkeztu zuela,eta udal txosten tekniko batek jasotzen duela “hainbat artxibo telematiko osatu gabe zeudela”. Txosten horrek dio obrak burutzeko URA (Uraren Euskal Agentzia), Cotorrio eta Errepideetako Foru Departamentuaren baimena behar dela, eta ez dituztela aurkeztu: “Udalak Petronorri dokumentu horiek eskatu zizkion, baina ez dugu erantzunik jaso”.

Legearen arabera, dagokion administrazio-baimenik gabe egiten den edozein jarduera “klandestinoa” da. Beraz, udalak obrak bertan behera utzi ditu berehala. Brionesek erabakia argitu nahi izan du: “Geldiarazteko dekretu honek ez du esan nahi udala Petronorren eta haren industria-jardueraren aurka dagoenik, baina koherentziagatik, legea betetzeko exijitu behar diogu enpresa honi, gure edozein bizilaguni eskatzen diogun bezala bere jabetzako obrak egiten dituztenean".

Obrak eteteko agindua ez betetzeak 600 eurotik jarduera “klandestinoaren” balioaren %10era bitarteko isunak ekar ditzake. Halaber, espedientea Fiskaltzara eramatea ere posible litzateke, desobedientzia-delituaren zantzuak badaude.