Lanek iraun bitartean eraiki duten harresiak bitan banatzen du hiria, horrek dakarren guztiarekin. “Hiriaren periferia harresiaren albo batera utzi dute. Alternatibak badira, etengabe ari gara proposamenak egiten baina ez digute entzun nahi”, adierazi du plataformako bozeramaileak sare sozialetan. Trenbide sare osoa lur azpitik eraikita egon arte, AHT Murtziaraino ez iristea eta geltoki gertuena 17 kilometrotara jartzea proposatzen dute. 128 egun daramatzate protestak egiten eta Twiterreko kontuan irmoki adierazi dutenez, ez dute amore emateko asmorik. Mugimendu antolatu eta indartsu bat eraiki dute PPren udal gobernuari aurre egiteko.

Protestak bezala, errepresioa ere areagotzen joan da egunak igaro ahala. Azken gertakarien arabera, asteazken gauean poliziak bi bizilagun atxilotu ditu kale erdian, inongo azalpenik eman gabe. Atxilotuetako bat adin gutxiko gaztea da eta deklaratu bezain laster aske utzi dutela adierazi dute herri plataformako kideek. Beste atxilotuak gaua polizia-etxean pasa du eta ez dakite noiz askatuko duten.

Kanpaldia indarrak batzeko

Egunero, arratsaldeko 20:00etan elkartzen dira Santiago el Mayor auzoan Pro Soterramiento plataformako kideak. Sare sozialetan salatu dutenaren arabera, poliziaren errepresioa areagotzen ari da urte berria hasi zenetik: urritik urtarrila bitartean jada 60 isun baino gehiago jarri dizkie poliziak auzokideei, 600 eta 2.000 euro artekoak. 2018 hasieratik kanpaldi bat ere antolatu dute, modu iraunkorrean agintariei hiria bitan banatuko duen harresia erabat arbuiatzen dutela argi uzteko. Momentuz trenbide ondoko parke batean “sendo” jarraitzen dutela diote plataformatik, deslojatzeko mehatxuak egon badaude. 

Hedabideek apenas jaso dituzte azken 128 egunetan behin eta berriz egin diren manifestazioen berri. Plataformatik salatu dutenez, “agintarien menpe dauden komunikabideengandik ez da ezer espero behar”. Hori dela eta, argazkiak, bideoak eta edukiak elkarbanatzeko kanpaina jarri dute abian, beraien borroka ahalik eta gehien zabaldu dadin. #MurciaNoSeParte #SoterramientoYa eta #AlasVias kontagailuetan herritarren jarduna jarraitu daiteke.

Udal Gobernuak herritarrak isilarazteko tresna guztiak erabiltzen ari direla iritzi dute eta elkarrizketarako parada aprobetxatu beharrean, herriaren aldarrikapenei entzun gor egiten dietela salatu dute. Ez dira fio ez bertako politikoez ezta Madriletik iristen diren promesez ere, aspaldiko kontua baita AHTren auzia Murtzian. Irailean egin zuten manifestazioa mugarri izan zen eta indarra eman zien borrokan jarraitzeko.