Hamabi urtez Donostiako apezpiku izan ostean, kargua utzi beharko du José Ignacio Munillak, Frantzisko aita santuak Orihuela-Alacanteko apezpiku izendatu duelako. Polemika ugari eragin ditu urteotan, feminismoarekin eta LGBTI komunitatearekin sartzeagatik eta Elizaren ondasunak hotel bihurtzeagatik, besteak beste. Gipuzkoako fededun katolikoekin ere izan ditu tirabirak.
Otsailaren 12an ekingo dio apezpikutza berriari Valentziar erkidegoan, eta ordura arte, Donostiako diozesiko administratzaile izango da. Munillak berak iragarri du eukaristia berezia ospatuko duela otsailaren 6an Donostiako Artzain Onaren katedralean, agur moduan.
Polemikaz beteriko hamabi urte
Eragin dituen polemikengatik ere ezaguna da Munilla. 2018an, martxoaren 8 bezperetan, adierazi zuen “deabruak gola sartu” diola feminismoari, eta kritika gogorrak jaso zituen bueltan. Hainbat emakumek protesta egin zuten Donostiako katedralaren aurrean.
Sexo con alma y cuerpo liburuan, gotzainak dio sexu berekoen arteko harremanak ezin direla inola ere onartu eta tradizioak beti azaldu duela “ekintza homosexualak intrinsekoki desordenatuak direla”. Behin baino gehiagotan egin zituen adierazpen homofoboak eta horiengatik guztiengatik muxukada kolektiboa eskaini zioten Harrotasunaren Egunean.
Gipuzkoako Elizaren ondasun higiezinak hotel bihurtzeagatik ere izan da kritikatua. Gipuzkoako Elizako kide asko ez ziren bat etorri erabakiarekin. Hain zuzen ere, gertaera horrek, Munillak gidaturiko gestioak eta beste hainbat kontuk tirabirak sortu izan ditu fededun katolikoen eta gotzainaren artean.
Adibide batzuk baino ez dira jarritakoak, bere adierazpen eta ekintzek soka luzea ekarri baitute behin baino gehiagotan.