2016ko martxotik 2017ko martxora arteko azterketa gauzatu du Oxfamek eta gogor kritikatu du aberastasuna nola eta zergatik banatzen den hain modu desorekatuan: munduko %1 aberatsenek sortutako aberastasunaren %82 bereganatu zuten. Horrela, bi eguneko pertsona berri bat aberatsa egin zen. Populazio erdia osatzen duten txiroenek aldiz, epe berdinean ez zuten hazkunde ekonomikorik nabaritu.

2010etik urtero, batez beste, %13 aberastu dira. Langileen soldatek nekez egin dute %2 gora duela zortzi urtetik. “Nazioarte zabalean hezkuntzan, osasunean eta politika sozialetan murrizketak etengabekoak diren bitartean, korporazio handien eta aberatsen irabaziak nabarmen igo dira”, azpimarratu du Winnie Byanyima Oxfam Internazionaleko buruak.

Emakumeak dira zatiketa ekonomiko eta sozial honen ondorioz bereizkeria handiena jasaten dutenak, bai lan munduan baita etxeko arloan ere. Emakumeak egiten dira zaintza lanen kargu, familia esparruan batez ere, eta lan horiek ez direnez herrialdeen barne produktu gordinaren barruan sartzen, ez dira diruz ordaintzen. Faktore horrek zuzenean eragiten du emakumeen independentzia ekonomikoan, baliabideak erabat mugatuak baitituzte. Gobernuz kanpoko erakundeak argi azaldu du:  “Aberastasunaren banaketa ez bada orekatzen, 170 urte beharko dira gizonek eta emakumeek lan berdina egitearen truke soldata bera izateko”.  

Bestalde, Oxfamek azaldu duenez, diru gehien dutenen pertsonek euren aberastasuna eguneroko lanaren ondorioz lortu dutenaren ustea orokorra da, baina kasu gehienetan zergak ez ordaintzeko abantailei esker eta ustelkeria kasuak frogatu izan diren industrietan zituzten parte hartzeen bidez eskuratu dituzte hainbeste milioi.

Aberatsen irabaziek erritmo honetan jarraituz gero hazten, 25 urte barru aberatsak bilioi dolarren arabera zenbatuko dira. Hau da, 2.738 urtez egunean milioi bat dolar gastatu beharko dituzten gizabanakoak izango dira munduko pertsonarik dirudunenak mende laurden barru.