Gasteizko jaiak hasteko astebete falta da eta GKSk eta Etxebizitza Sindikatuak jakinarazi dute Gasteizko Udalari baimen berezi bat eskatu diotela txosnak hiriko beste leku batean jarri ahal izateko. Mugimendu Sozialistako bi eragileek txosna jartzeko aurkitu duten debekuaren aurrean eta “konpondu gabe dagoen afera hau ahalik eta modurik egokienean bideratu dadin” Txosnak guztiontzat manifestua kaleratu dute.

Manifestua honako hamairu pertsonek sinatu dute: Oihane Perea, Fernando Antia Txiki, Rebeka Gonzalez de Alaiza, Mati Iturralde, JuantxuOzkoz, Goiza Perez, Oier Azkarraga, Angel Madina Bodegas, AmparoLasheras, Mikel Elorza, Patxi Garcia Poio, Gorka Aurrekoetxea eta Javi Aguillo.

Otsailean salatu zuten Gasteizko Txosna Batzordeak Etxebizitza Sindikatuari eta Gazte Koordinadora Sozialistari jaietan txosna jartzea debekatu dietela eta momentuan erabakia aldatzeko eskatu zuten bi taldeek. Manifestuan nabarmendu dute gauza jakina dela finantzatzeko, eragiteko eta ikusgarritasuna eskuratzeko tresna ezinbestekoak direla jaiak eta txosnak eta salatu dute batzuek arazoak dituztela beren jarduna aurrera eramateko eta jaietan parte hartzeko.

Ziurtatu dute badaudela arazo hau saihesteko gaitasuna, erantzukizuna eta bitartekoak dituzten “erakunde eta eragile inplikatu ugari” eta Gasteizko udal gobernua eta udaleko alderdi politikoak ikusle soilak ez direla azpimarratu dute.

Baimena onartzeko eskaera

Jaiak eta jai eremuak guztienak izan behar direla salatu dute, udalean ordezkaritza politiko instituzionala duten alderdi politikoek jaietan guztien parte hartzea bermatzeko ardura eta erantzukizuna dutela nabarmendu dute manifestuan. Azaldu dutenez, soluziorik egokiena da Gasteizko udalak Mugimendu Sozialistak txosna hiriko beste gune batean kokatu ahal izateko egindako eskariari erantzun positiboa ematea.