Bulegoaren zereginetako bat izango da gainerako kooperatiben beharrak analizatzea eta lanpostu horiek beteko lituzketen beharginen profilak definitzea, Etxetresnetako langileak beharren arabera birkokatzeko.

Mondragon Korporazioak jakinarazi du langile batzuk birkokatu dituela jada, eta taldeko kooperatibek lotuak dituztela hainbat elkarrizketa Etxetresnetako langileekin, postu zehatzetarako hautagaiak aukeratzeko.

Bestalde, oharrean dio kooperatiba ereduan "konfiantza osoa" duela eta Etxetresnetako egoerari betiko moduan egiten ari zaiola aurre: "Elkartasun mekanismoetan, kooperatiben arteko elkarlanean eta erantzukizun kolektiboan oinarrituta".