Igande gauean eraso egin diote Baionako meskitari. Gutxienez bi molotov koktel jaurti dituzte. Ez da inor zauritu eta kalte material txikiak egin dituzte.
France Bleu atariak eman du erasoaren berri. Argitaratu dituzten argazkietan erasoak eragindako kalte txikiak ikus daitezke. Meskitako kideek astelehen arratsaldean jarri dute salaketa Polizia-etxean, baina orain arte ez dute erasoaren berri publikoki eman nahi izan. Ikerketa irekita dago eta oraingoz ez dakite nor diren erasotzaileak.
Ez da Baionako meskitak jasaten duen lehen erasoa. 2015ean Charlie Hebdoren kontrako atentatuaren ostean, «Charliberté», «sales arabes» (arabiar zikinak) eta «assassins» (hiltzaileak) zioten margoketak eta gurutze gamatuak egin zituzten hainbat ezezagunek meskitan.