Iruñeko mobilizazioa jendetsua eta hunkigarria izan zen askorentzat. Bertako bizilaguna zen Elhadji Nadiaye izan zuten gogoan manifestariek. Ndiaye, Floyd bezala, poliziaren atxilotze bortitz baten testuinguruan hil zen. Donostiako deialdiak Bulebarra bete zuen. Migratzaile pobretuek gure lurretan pairatzen dituzten hainbat diskriminazio salatu zituzten: etxebizitza bilatzeko orduan, enpleguan, legeztatzeko... Iruñean zein Donostian, manifestariak belauniko jarri ziren.

Gasteizen ehunka pertsona bildu ziren arrazializatutako pertsonen kolektiboek deituta, Andra Mariaren enparantzan. “Justiziarik gabe, ez da bakerik izango”, izan zen lelorik oihukatuenetako bat. Bilbon kontzentrazioa Justizia Jauregiaren aurrean egin zen. Arrazakeria instituzionala salatu nahi izan zuten deitzaileek. Baionan kontzentrazioa ostegunean egin zen, polizia etxearen aurrean.