Miren Zabaleta, Bittor Rubio, Aitziber Campion, Haritz Romeo, Maite Sabalza, Garazi Labiano, Iñigo Jurado, Joseba Compains, Oroitz Zabala, Egoi Irisarri, Garbiñe Bueno, Aitziber Larrea, Jon Garai, Joseba Otondo, Joseba Martinez, Alizia Iribarren, Jone Lozano, Elena Urabaien, Unai Razkin, Kepa Sanmartin, Bakartxo Ruiz, Nahia Fernandez, Sabino Cuadra, Patrizia Perales, Miren Conde, Gorka Mayo, Eguzkiñe Aiesa eta Alberto Matxainek osatuko dute Sortuko Nafarroako zuzendaritza. 500 bat lagunek hartu dute parte Nafarroako zuzendaritza hautatzeko barne hauteskundeetan.

"Euskal Errepublikaren bidean Nafarroaren burujabetza prozesua sustatzeko konpromisoa" azaldu du Miren Zabaletak. "Ezker abertzaleak bere egitasmo politikoa berretsi eta independentziarako hautua bideratzeko egokitzapen estrategikoan sakontzeko ariketa kolektiboa burutu du. Egindako bidea emankorra izan da dagoeneko, eragin zuzena izan duelako Euskal Herriko argazki politikoan eta prozesu soberanista-independentista bultzatzeko baldintza berriak sortu dituelako".

Zabaletak esan duenez, Nafarroa "une historiko itxaropentsuan" dago: "Aldaketa instituzionalak hamarkadatan Erregimenak ezarritako apartheid instituzionala gainditu eta orain arte baztertutakoen gobernuak osatu dira". Ildo horretan, azpimarratu du "aldaketa sustatzeko bide bakarra aldaketan sakontzea" dela.

"Aldaketaren ibilgailuari galga" jarri nahi diotenen aurrean, Zabaletak beharrezkotzat jo du "Nafarroako erakunde eta herritarren burujabetza-erabakimen osoaren defentsa, aldarrikapena eta praktikan sakontzea. Burujabetzea Nafarroarendako aukerarik onena da".

Albiste hau Euskalerria Irratiak argitaratu du eta CC by-sa lizentzia baliatuta ekarri dugu ARGIAra