Jendetsua eta zaratatsua izan da astelehen arrastirian Baionan eginiko manifestazioa. Milaka lagun batu dira bezperan eskuin muturrak lorturiko garaipenari erantzuteko beharretik. RN c´est la haine [RN herra da]; Euskal Herria Antifaxista; Bardella entzun pin pan pun; De Gaza au Pays Basque: antifasciste [Gazatik Euskal Herrira: antifaxista]... hastetik buru oihuka iragan da protesta.

Sindikatu, ezkerreko alderdi politiko zein elkarte batzuen banderak ikusi ahal izan dira eskuz eraikitako pankarta propio andanaren artetik. Gazteria batu da nagusiki eta Fronte Nazionala alderdia Batasun Nazionala bihurtu arren, la jeunesse emmerde le Front National [Gazteriak kakinarazten du Fronte Nazionala] lelo historikoa bere egin du egungo belaunaldiak ere.

Baionan bezala beste hamarnaka hiritan manifestazioak egiten ari zirela, bildurik ziren Parisen ezkerreko alderdietako ordezkariak, Frantziako Legebiltzarrerako hauteskundeetarako adostasun bat lortu eta hautagaitza bateratu bat osatzeko asmoz. Gaueko hamarrak aldera zabaldu zen sare sozialetan batasuna lortu izanaren albistea. Eskuin muturrari bidea mozteko xedez, hautagaitza bakarra izanen da ezkerrean ekainaren 30eko eta uztailaren 7ko bozketetan.