Eusko Jaurlaritzako Segurtasun Sailak abenduaren 31n baieztatu zuen gertaera. Sailaren esanetan, 01:00ak aldera Mercedesko segurtasun langile baten deia jaso zuen Ertzaintzak, gizon batek hondeamakina batekin Mercedeseko atea erauzi eta barruko aparkalekuko luxuzko furgonetak apurtzen ari zela-eta laguntza eskatuz. Zenbait hedabidek ziurtatu dutenez, zaindariak tiro egin zuen pistolarekin hondeamakinako gidaria gerarazi nahian, baina ez zuen lortu. Ertzaintzak Miranda de Ebroko (Burgos) 38 urteko gizona atxilotu eta epailearen aurrera eraman zuen. Epaileak kargupean aske utzi zuen gizona 31ko arratsaldean, kalteak eragitea leporatuta.

Erasotzailea, Mercedeseko langile ohia

Mercedes multinazionalaren aurkako erasoa burutu duen gizona enpresako langilea izan zen 2016-2017 urteen artean, enpresak berak baieztatu duenez. Kontratua amaitu zitzaionean ez zioten berritu. Gertakaria langile eta zuzendaritzaren arteko tentsio garai batean heldu da. Azaroan Gasteizko Mercedeseko zuzendaritzak iragarri zuen urtarrilean aldi baterako 500 langileren kontratuak eteteko asmoa duela, eta langile finkoei enplegua erregulatzeko espedientea ezartzea “arrisku erreala” dela. Egun batzuk beranduago, langileen enpresa-batzordeak zuzendaritzaren plana auzitara eramateko erabakia jakinarazi zuen.

Hondeamakina Legutio (Araba) ondoko Gojain poligonoko enpresa batean lapurtu zuen gizonak, bertan ere kalteak eraginez. Poligono horretako enpresa batetik kaleratua izan zen berriki gizona, iturri batzuen arabera lapurreta burutu zuen enpresa beretik, hain zuzen ere.

5 milioi euro kaltetan

Abenduaren 30eko erasora bueltatuz, Mercedeseko arduradunek 5 milioi eurotan baloratu zituen langile-ohiak eragindako kaltea. Azaldu zutenaren arabera, txikitutako furgonetak Gasteizko lantegian ekoizten diren garestienetakoak dira, 80.000 eta 100.000 euro artean saltzen direnak.