argia.eus
INPRIMATU
Mendebal Europan COVID-19aren kutsatuen ugaritzeak jada ekarri du heriotzen gehitzea

  • Prebentzio eta Kontrolerako Europako Zentroak (ECDC) zabaldu duen mapan eta egunero berritzen dituen estatistiketan jada nabarmena da heriotza tasen ugaritzea herrialde guztietan. ageri denez, kutsadura kasuak eta baita heriotzak ere ugarituz. Dagoeneko herrialde batek, Txekiak, gainditu du 100.000 biztanleko 8,5 heriotzen tasa. Goranzko joerak jarraituko du kutsatze tasen handitzea eten eta beherantz hasi bitartean.

Pello Zubiria Kamino @pellozubiria 2020ko urriaren 23a
COVID-19aren hedadura Europan 2020ko urriaren 21aren aurreko 14 egunetan. (Irudia: ECDC)

Joan den astean nabarmena baldin bazen COVID-19aren bigarren olatua gaiztotzen ari zela Europan osoan (eta Euskal Herrian ere bai), urriaren 23 honetan ECDCk eskainitako datuetan ikus daiteke kutsaduraren handitze hori islatu dela heriotzen ugaritze handian ere.

Kutsadura tasen handitzea da grafikoki nabarmenen ikus daitekeena, ECDCk mapa batean koloretan ipintzen duelako: marroi iluna nagusitu da Europa gehienenean, Espainiako estatutik hasita Polonia eta Errumaniarainoko arku zabalean, eta beranduago bada ere marroitara jo dute gainerako herrialdeek, bidenabar eskandinabiar eta baltikoek. 100.000 biztanleen artean detektatutako koronabirus positiboen tasetan, Txekia milakoa gaindituta 1.066era iritsi da. Atzetik okerren dabiltzanak dira: Belgika 932, Herbehereak 696, Erresuma Batua 367, Espainia 360... (Euskal Herrira etorria, EAEn urriaren 22an tasa hori 452 izan da, Araban 319, Bizkaian 370 eta Gipuzkoan 626).

Heriotza tasetan rankingak, ordea, panorama ezberdin bat erakusten du, iradokitzen duena kutsatuen tasak tentuz erabiltzekoak direla, edo herrialde batzuek test masiboak egitean benetako positibo kopuruetatik hurbilagoko datuak ematen dituztelako edo bigarren olatua goizago gaiztotu den herrialdeetan goizago handitu direlako ere heriotza tasak. Bi herrialde alderatzeko, Islandiak 100.000ko 296 kutsaturekin 0,3 heriotza eduki ditu, aldiz, Greziak kutsatu kopuruen tasa 59an edukita heriotzena 1-ean dauka. Gauza bera esan daiteke euskaldunok parte garen bi estatuez, Espainiak heriotza askoz gehiago dauzka Frantziak baino, honek kutsatze tasa altuagoa izanik.
 
COVID-19agatiko heriotzetan ere Txekia dabil larrien, 14 egunean 100.000 pertsonako 8,5 heriotza nozituta. Atzetik datozkio Errumania (4,4), Hungaria (4,2), Espainia (3,8), Belgika (3,7), Polonia (2,8), Erresuma Batua (2,5), Frantzia (2,4)... Aurreko astetik hona heriotza kopuruak bikoiztetik hurbil izan dira, koronabirusaren bigarren olatuak dakarren indarraren erakusgarri. (Euskal Herrian ez da zabaltzen 100.000 biztanleko 14 eguneko heriotza tasarik).
 
Mendebaldeko Europako 14 egunotako aipatu datuak, gehi bi aste horietako kutsatu eta heriotzen kopuru absolutuak, grafiko honetan erakusten ditu ECDCk: