XX. mende hasieran Irlandako Errepublika sortu eta Sinn Fein banatu ondoren, emaitza historikoak lortu ditu ezkerreko alderdi errepublikarrak. 160 eserleku ditu legebiltzarrak eta oraingoz 78 banatu dira alderdien artean: 29 Sinn Féinentzat, 16 Fianna Fáilentzat eta 14 Fine Gaelentzat, orain gobernua gidatzen duen alderdiarentzat.

Inkesten arabera, Sinn Feinek eskuratu dezake botoen %24,5, Fianna Fáil-ek %22,2 eta Fine Gael-ek %20,9. Azken bi alderdi hauek sostengatzen dute egungo gobernua 92 botorekin. Gehiengo osoa 80 jarlekutan dago eta ez dirudi bi alderdiek samur izango dutenik kopuru horretara iristea. Seguruenik bihar jakingo dira guztiz emaitzak zeintzuk izan diren. Irlandako alderdi sistemak “botoen transferentzia” baimentzen du eta horrek kontaketa geldotzen du. Sistema honetan, alderdietako hautagaiak alfabetikoki egindako zerrenda batean aurkezten zaizkio herritarrari eta honek izendatzen ditu 1, 2, 3, 4… zenbakiekin zeintzuk diren bere lehentasunak.

Alderdi nagusiek Sinn Fein oso baztertua izan dute Irlandako Errepublikako politikan, besteak beste, IRAren adar politikoa zela aitzakiatzat hartuta. Mary Lou McDonald Sinn Féineko zerrenda buruak adierazi duenez, “orain alderdia ezinbestean kontuan hartu beharko dute” hamarkadatan baztertu ondoren. Hauteskunde kanpainan zehar, Fine Gaelek gobernua eratzeko Sinn Féinekin ez duela hitz egingo zehaztu du. Fiana Fáilek hitz egiteko prest dagoela adierazi izan du.

Azken urteetan hirugarren indar gisa mantentzea lortu du alderdi errepublikarrak, baina emaitza hauek ezustekoak izan dira. Antza, Irlandak azken hamarkadatan izandako hazkunde ekonomikotik at geratu diren sektore sozialek bozkatu dute Sinn Féin, bereziki gazteek. Esate baterako, bere programan proposatu du etxebizitzetako alokairuak hiruz urtez izoztea edo 100.000 etxebizitza publiko eraikitzea.