"Elkarrekin urrunago goaz" leloa aukeratu du aurten Integrazio Batzordeak, martxoaren 26an abiatuko duen kanpainarentzat. Helburua: 176.000 euro lortzea, Seaskaren sarean diren 162 haurren hezkuntza programa bermatzeko. Urtez urte, emendatuz doa beharra: aurten 70 dira lehen mailan eta 92 bigarren mailan; 2021ean, berriz, 118 haurrekin hasi eta 150ekin bukatu zuten ikasturtea.

Informazio mahaiak eta laguntza deiak bideratuko dituzte Ipar Euskal Herriko hainbat hiri eta herritan martxoaren 26an. Horrez gain, hainbat ekimen izanen dira dirua biltzeko: martxoaren 20an Itsas Laminen Korrika Angelun; martxoaren 28an Larzabalen haur autista duen guraso baten lekukotasuna ikasleen aitzinean; apirilaren 3an Neska Korrika Azkainen; apirilaren 24an Donibane Garaziko zinema gelan dokumental bat proiektatuko dute; eta Kanbon Brik a Brak salmenta ukanen dute maiatzaren 26an.

Frantziako Estatuaren laguntzak gutxitu dira

Frantziako Hezkunde Nazionalak ez ditu laguntzaile postu guztiak diruztatzen. Hori horrela, Integrazio Batzordeak hainbat postu bere gain hartu behar ditu, lan kontratu mugatuak erabiliz. Gisa horretan, 2020-2021 ikasturtean hamaika langile enplegatu zituen Integrazio Batzordeak –zazpi AESH edo kurtsoetarako laguntzaile, hiru begirale hezitzaile eta kantina orduentzat langile bat–. Aurten kantina orduetako laguntzaileen postuak ez ditu diruz lagundu nahi Frantziako Estatuak, dioelako lekuko instituzioena dela ardura hori. Gutuna bidali die herriko etxeei, baina oraingoz ez du erantzun baikorrik jaso Integrazio Batzordeak.

AESH lan postuak "azpi-baloratuak" direla adierazi du elkarteak, baina, prekarizazio hori Frantziako Estatuaren politikaren emaitza da.

Betebehar horiek guztiak aurrera eramateko dute diru kanpaina bideraturik. 1999 urtean sortu zuten elkartea eta urtez urte handituz joan da.