argia.eus
INPRIMATU
Marixol Iparragirre absolbitzen zuen epai bat baliogabetu du Espainiako Auzitegi Gorenak
  • 1985ean ETAk Gasteizen burutu asmo zuen atentatu batean izandako ustezko parte hartzegatik epaitua izan zen Marixol Iparragirre, eta iazko martxoan absolbitu egin zuen Espainiako Auzitegiak. Auzitegi Gorenak epaia baliogabetu du, eta magistratu ezberdinekin epaiketa errepikatu dadin agindu du. Hatz-marka batzuekin lotutako probaren balorazioa albo batera utzi izana da horretarako aurkeztu duen arrazoia.

ARGIA @argia 2022ko uztailaren 20a

Espainiako Auzitegi Gorenak baliogabetu egin du 2021eko martxoaren 29an Espainiako Auzitegiak emandako epaia, zeinak Marixol Iparragirre absolbitzen zuen 1985ean ETAk Gasteizen gauzatu asmo zuen baina burutu ez zen atentatu batean parte hartzetik. Gorenaren arabera, Iparragirreren absoluzioa agindu zuen tribunalak alde batera utzi zuen hatz-marka batzuekin lotutako daktiloskopia probaren balorazioa, "arrazionala ez zen argudiaketarekin", eta arrazoi horrengatik epaia baliogabetu eta epaiketa berriz egiteko agindua eman du, magistratu ezberdinekin.

1985eko maiatzean ETAk Gasteizko Mendizorrotza kiroldegian egin asmo zuen atentatuan izandako balizko parte hartzeagatik epaitu zuten Iparragirre. Ustez polizia dispositibo baten aurka lehertaraztekoa zen bonba-autoan hatz-markak aurkitu zituzten, baina kontraesana dago 1985ean atestatua egin zuten perituek deklaratutakoaren eta adierazpen batzuetan aipatua izan den txostenak dioenaren artean. Perituen arabera autoan pertsona bakarraren hartz-markak aurkitu zituzten, baina Iparragirrerenak ere antzeman ziren txostenaren arabera, "zeinaren berri ez zuen izan agintaritza judizialak 2019a arte".

Gorenaren arabera, perituen deklarazioak jasotzen dituen txostenak ez du ukatzen Iparragirreren hartz-marken existentzia, eta markak anonimo gisa artxibatu zituen.

.