Dendak oro har irekita ikusten ziren, baina ohi baino emakumezko gehiago kaleetan. Emakume pikete batzuk greba iragartzen ari ziren han-hemenka, kalean atzera-aurrera ibiliz eta batzuetan supermerkatu eta denda handietara sartuz.

30en bat gaztez osatutako pikete horietako bat Baluartera hurbildu da eta Punto de Vista dokumentalen jaialdira sartu da. Interakzio polita sortu da, bertan ziren pertsonek txaloka hartu baitituzte. Piketeak grebaren berri eman eta alde egin du pozarren. Hurrengo helburua Baluarten bertan izan da. Gaur Ikasle eta Enpleguaren Europar Aretoa zegoen bertan eta, ikaslez mukuru,  piketeak han ere eman du itzuli bat. Espainiar armadako militar talde bat ere han izan da, eta haiei ere banatu diete grebaren papertxoak bi neskek. Dena giro lasaian joan da Baluarten.

Talde hau beste hainbatekin batu da eta denak El Corte Inglésera joan dira, baina Espainiako Poliziak ez die utzi barrura sartzen. Kanpoan aritu dira oihuka eta kantuan, umore eta aldarrikapen giroa batuz. Pixka bat lehenago, 10:30etan, Iruñeko Udaleko ordezkariek agerraldia egin dute Udal Plazan, greba deialdiarekin elkartasuna agertuz.

Geroxeago, 11:00etan, berdintsu egin dute Nafarroako Legebiltzarreko talde parlamentario guztiek Legebiltzarraren aurrean. Osoko bilkura bukatu denez, talde guztiak atera dira kanpora, baita UPN eta PP ere, hori izan da akaso deigarriena. Jokaldi horrekin haserre ziren hainbat parlamentari, baina egia esan, baloratzekoa da talderik atzerakoienak nahiago izan dutela argazkian agertu ez agertzea baino. Beste hainbat balorazio ere egin liteke, baina hori bera ez da gutxi gaurko greba eta mobilizazioaren deitzaileen indarraren alde.

Sarasate Pasealekua lepo emakumez

Parlamentukoaren ondoren kazetari hau Zabalgunean eta bereziki Alde Zaharrean ibili da eta ordurako oso garbi zegoen Sarasaten jende asko bilduko zela, alde guztietan ikusten baitziren emakume taldeak: helduak, gazteak, ikasleak… horietako batzuk apurka bildu egin dira eta zutabetan iritsi dira Sarasate Pasealekura. 12etan zen hastekoa ekitaldia, eta 11:45ean gainezka zegoen dena.

Monumentuaren azpian geratu naiz eta ezin izan naiz handik mugitu atzera-aurrea ekitaldia ondo jasotzeko: ezin zen. Baziren beste kazetari batzuk ere, eta guztiak geldi han, jendetzak bertatik jarraitzera behartuak. Krisiaren aurka 2010, 2012 eta oro har, garai hartan egin ziren mobilizazio handietan ere ez zegoen hainbeste jende Sarasaten. Normalean eszenatokia Sarasate Pasealekura begira jartzen da eta gaur ere bai; ohikoan ez da jenderik egoten monumentuaren atzean eta gaur lepo zegoen Gazteluko Plazaraino.

Hurrenez hurren batukada, bertsolariak eta dantza izan dira protagonista. Eta oihu bakarra, ez oso sarri baina bai oso ozen: “Gora greba feminista”. Marea morea zen hura, eta emakumeak pozarren ziren, agerikoa zen. Hitzaldian mugimendu feministako ordezkariak argi utzi du: “Historikoa da bizitzen ari garena”. “Langileek, nekazariek, pentsionistek, ikasleek… gaur planto egin dugu. Ordua zen!”.

“Bide luzea dugu, baina hau pauso erraldoia da” amaitu du bere bertsoa lehen bertsolariak. “Nik izan nahi dut librea” izan da bigarrenaren amaiera. Eta “hemen gaude, justizia eske” jaurti du hirugarren batek. Ondoren, agertokitik dantza gidatuta, neska batek pasealeku osoa jarri du dantzan. 16:30etarako ekitaldi bat iragarri dute Sarasaten bertan eta 20:00etan manifestazioa Gazteluko Plazatik abiatuko dela. Ondoren bazkarien festa hasi da. Bakarrik goizean eta eguerdian bizitakoarekin, izango dute elkarri zer kontatu.