Abuztuaren 7an egin dute publiko Macron legearen onarpena Frantziako Aldizkari Ofizialean. Aldaketa ugari ekarriko ditu lege berriaren ezarpenak. Hala nola, ibilbide luzeko autobusen liberalizazioa onartu dute, enpresa pribatuei joan-etorri hauetan lineak jartzea ahalbidetuz.

Igandeetan saltokiak irekitzeko aukera da hartutako beste neurri esanguratsua. Turismo handiko eremuetan saltokiek jaiegunetan irekitzeko aukera izanen dute. Ipar Euskal Herriko hainbat eskualderi zuzenean eragingo die neurri horrek. Igandean lan egitea borondatezkoa izango dela zehazten du legeak, baina sindikatuek jada salatu dute langileen aurka egiten duela neurriak.

Legeak kritika ugari jaso ditu gizarteko esparru askotatik, eta baita gobernuko oposizioaren partetik ere. Frantziako Gobernuak adierazi du Emmanuel Macron Ekonomia ministroaren abizena daraman legea “luze gabe” indarrean jarriko duela.