Bi hilabete barru jokatuko da Frantziako presidentzialetarako bozen lehen itzulia. Kanpaina ofizialki hasi gabe, inkesten emaitzak nolakoa politikarien jokoa halakoa. Honela diote azken inkestek: Le Penek bozen %27 eskuratuko luke. Fillonek %20 (eskuindarrak). Macronek % 17 (zentrista liberala). Melenchonek %12 eta Hamonek %12 (ezkerrekoak).

Ustelkeria kasuarengatik Fillon auzibidean jarri aurretik, eskuindarren arteko buruz burukoa iragarri zen presidenterako lehian. Auziperatzeak krisian sartu zuen, alta bada, auzia ez da artean iritsi eta Fillonek gora egin du inkestetan berriz ere. Aste honen hasieran, ordea, François Bayrouk (MoDem alderdi zentristako presidentea) bere hautagaitza iragarri zuen. Frantziarrak airean eta aierutan izan ditu azken egunetan. Prentsaurrekoan baina, Macronen aldeko bere sostengua adierazi du. Bayrouri bozen %6a eman diote inkestek.

Macron ez ohiko hautagaia da. Finantza gizona. Alderdirik gabekoa. Bere mitinetan, agertokia eszenatokia bihurtzen du. Politikaren prestidigitadorea da, karta esku-jokalaria. Nonbait, Fillon berriz ere gora zihoala ikusirik, Bayrou hipnotizatu du. Izan ere, Fillonen aurkako lehian galdu zuen Alain Juppé zen Bayrouren gizona. Juppé presidente izanez gero Bayrou lehen ministroa izan zitekeen eta, edo Frantziako Gobernuko ministerio baten buru eta jabe.

Aukera hura aienatua, Macronek beste aukera bat eman diola pentsa daiteke. Bayrouk presidentegai ez izatea erabaki du. Bayrouk deus erran gabe gera zitekeen bazterrean, baina aste honetan efektu berri bat sorrarazi duen frantziarren bozen joeran. Bayrouk En Mariche! mugimenduko presidentegai Macroni –Hollande presidentearen ekonomia ministro ohia–  “aliantza gisako bat” eskaini dio. Bayrouk hainbat baldintza jarri bide dizkio Macroni hauteskunderako programan. Gaur eman ditu lehen zehazpenak arlo ekonomikoari dagokionean, datozen asteetan sakon aztertuko direnak. Alabaina, artean, Juppé hautagai sendo zenean, Macron “kapitalaren hautagaia zela” adierazi zuen Bayrouk publikoki.

Nork eskaini dio aliantza nori? Bayrouk Macroni edo alderantziz? Izan ere, inor presidente berria bada, ez da Bayrou izanen, Macron baizik. Bayrouk goi-mailako politikatik  at bere burua kanpo jarri omen zuen –2002, 2007 eta 2012 urtetan presidentegai izan zen– presidentearen Eliseo egoitzara iritsi ezinean. Oraingoan, berriz, lehen ministroaren Matignon egoitzan leku har lezake. Edo hori lortu ezinean, 1993rik 1997ra bitartera gidatu zuen Hezkunde Nazionaleko ministerioaren burua izatera itzul liteke. Macronek ez du Gobernua taxuz osatzeko funtsezkoa den alderdi baten egitura. Bayrouk bai.

Bidenabar erranik Marine Le Peni ustelkeriak egozten dizkiote Europako Parlamentutik. Bruselan ez dute eskuin muturreko Le Pen nahi. Ezkerreko hautagaiek –Melenchon eta Hamon– ez dirudite elkar engainatzeko gisan daudenik. Egungo ezkerreko hautagaiek ez dute François Mitterrand zeukan prestidigitadore ahalmenik.

Egungo presidente François Hollandek ez du ere prestidigitadore itxurarik. Hala ere, nork daki? Macron izan liteke bere maukan zeukan karta. Ez dezagun ahantz: Bayrouren sostenguari esker heldu zen Hollande presidente izatera. Agian, ez eskuin ez ezker, Macron da Europar Batasunaren gain-beherakada geldiarazteko stabilissement-en karta.