Maddalen Iriarte kazetariak eta Kike Amonarriz soziolinguistak aurkeztuko dute ekitaldia. Besteren artean, taldeko idazkari nagusi Paul Riosek eta Harremanetarako Nazioarteko Taldeko kide Brian Currinek hitz egingo dute; eta bederatzi urteotako irudiak proiektatuko dituzte. Halaber, Lokarrik iragarri du "bake prozesua errotzeko" azken proposamenaren berri emango duela.

Iazko urrian iragarri zuen Lokarrik bere ibilbidea amaitutzat emango zuela, hainbat arrazoik bultzatuta. Besteak beste, bere zikloa bete duela eta bake prozesua "atzeraezina" dela ikusita hartu zuen erabakia.

"Lasai eta pozik gaude prozesua atzeraezina delako eta euskal gizartea errespetuan eta elkar-ulertzean oinarritutako bizikidetza bat errotzeko gai izango delako", zioen orduan Paul Riosek. Gaineratu zuen "aro baten amaiera" besterik ez dela, eta bakearen eta bizikidetzaren aldeko "konpromiso bizia" mantenduko dutela martxotik aurrera ere, "baina beste gune batzuetatik" arituko direla lanean. 

"Bake prozesua errotzeko baldintzak gure azken urteetako historian izan diren hoberenak direnean erabaki hau hartzeak itxaropenez betetzen gaitu", adierazi zuen Lokarriko ordezkariak.

Paul Rios ARGIAn:

Konponbiderako elkarrizketarako baldintzak (2011-03-27)

"Poliki, baina ate bat irekitzen ari da ezker abertzalean" (2010-04-04)