Manifestazio jendetsuak egin dituztean larunbatean Argentinako hainbat hiritan. Javier Milei presidenteak "pedofilo" deitu ditu LGBTIQ+ pertsonak Davoseko Munduko Ekonomia Foroan.
Argentinako hainbat hiritako kaleak Javier Milei presidentearen aurkako protesten lekuko izan dira larunbatean, LGBTIQ+ komunitatearen nahiz antifaxismoaren inguruko mugimendu sozial ugarik deituta. Urtarrilaren 20 eta 24aren artean Davosen (Suitza) ospaturiko Munduko Ekonomia Foroan egin zituen adierazpenen harira irten dira kalera manifestariak.
Besteak beste, queer mugimendua haurren aurkako abusuekin lotu zituen Argentinako presidenteak: "Bere muturreko bertsioetan, genero ikuspegia haurren aurkako abusu garbia da. Pedofiloak dira". Gainera, feminismoa berdintasunaren kontzeptuaren "distortsioa" dela azaldu zuen, soilik "onurak" bilatzea xede duena.
El Salto hedabideak argitaratu duenez, deialdiak bi milioi pertsona inguru bildu ditu Argentinako puntu ezberdinetan, eta antolatzaileek elkartzeko deia luzatu diete herrialdeko LGBTIQ+ komunitateko kide orori: "Javier Mileiren Gobernuaren indarkeria ekonomikoaren, jazarpen politikoaren eta sexu errepresioaren aurkako erantzunak gure komunitatearen koloreak ditu; elkartuz eta aliantzak eginez herrialde osoan zehar, gure ezberdintasun guztiak artikulatuz".