Emaus Fundazioak eta Gipuzkoako Foru Aldundiak Komunitate inklusiboak, kulturartekotasuna eta partaidetza konferentzia antolatu dute, hilaren 22 eta 23an, Donostian. Errefuxiatuen zein bazterketa egoeran dauden beste kolektiboen gaiak jorratuko dituzte, besteak beste. Hainbat adituk parte hartuko dute, horietako batekin hitz egin dugu: Assumpta Ayerdi.
Assumpta Ayerdi Emauseko kidea da eta garapenerako partaidetzan aditua. Gaur, asteazkena, Komunitate eta eraldaketarako partaidetza hitzaldia eskainiko du Koldo Mitxelena aretoan. Bi egun hauetan egingo den konferentziaren gakoak partekatu ditu ARGIArekin.
Errefuxiatuen auziak jendartearen kontzientziak piztu dituela probestuz, gizarte esklusioan dauden pertsonen inguruko gogoeta bat proposatu nahi dute antolatzaileek. Gizarte eredu berri bat sortzeko kontzeptu klabe batzuk proposatu dituzte horretarako: inklusioa, integrazioaren ordez eta kulturaniztasuna, multikulturalitatearen ordez.
Baina, zein ezberdintasun dago hauen artean? Assumptak azaldu digu: proposatzen duten gizarte inklusiboaren berezitasuna da “komunitate osoa saiatuko dela sistemaren arauak aldatzen”, baztertutako pertsonak gizarteratu ahal izateko. Plano berean, kulturaniztasunean oinarritutako gizartean “kultura guztiek balio berdina izango dute eta elkar eragingo dute”.
Assumptak azaldu duen moduan, gizarte eraldaketarako beste gako bat da bazterturik dagoen norbanakoaren “ahulduntzea” lortzea. Horretarako, balore kolektiboagoak dituzten komunitatetik ikastea eta hauek “gure gizarte indibidualistan” txertatzea ezinbestekotzat jotzen du. “Lortuz gero, onartuko genuke baztertutako pertsonen egoera ez dela euren errua, baizik eta sistemak sortutakoa”.
Egungo akatsak, etorkizuneko erronkak
Assumptaren iritziz, gaur egungo akats nagusia gauzak “azkar eta sinple” egitea da. Horren ordez, “ekintzetatik prozesuetara pasatzea” proposatzen du. Baina horretarako saretze indartsu bat behar dela dio. “Lehian ibili beharrean, prekarietate mota guztiak sistema berak sortzen dituela konturatzean dago gakoa”. Txertatu beharreko beste ikasgai bat: generoa. Bazterketa egoeran dauden emakumeengan “faktore bereziek” eragiten dutela azaldu du (biolentzia, zaintza eta arlo emozionala, besteak beste). Hauentzako soluzioak bilatzearen premia azpimarratu du.
Errefuxiatuak: bihotz batzuk mugitu dituen gaia
“Errefuxiatuen auziak pentsaera batzuk mugiarazi ditu, bihotz batzuk”, azaldu du Assumptak. Hots, jendeak elkartasunerako jarrera irekiagoa dauka. Krisi honetatik aukera berriak sortzearen garrantzia azpimarratu du: “Errefuxiatuen arazoa salatu behar dugu, baina erakutsi behar dugu hemen ere kasuak daudela, sistema beretik datozenak”.
