Maddi, Olaia, Maialen eta Olaia langile ohien lekukoa jaso du Donostiako babes Sareak. Bertan salatzen dute besteak beste kontratu gabe lan egin izana edo dagokien soldata ez jasotzea. Sarearen arabera, lau langile hauek dira lekukotasuna ematen ausartu diren bakarrak, baina praktika ohikoa da enpresa honetan. Hilabetean hainbat aldiz aldatzen da langilez, “ohikoa baina azkarrago”.

Maddiren kasuan adibidez, hilabetez astean hogei ordu lan eginda 650 euro bermatzen zizkion, baina zegozkion baino ordu gehiago egiteaz gain gutxiago kobratu duela adierazi du, 571 euro hain zuzen. Olaiak salatzen duenaren arabera berriz, astebete eta egun bat lanean egon ondoren utzi egin zuen ez ziotelako hitzartutako kontratua egin. Oraindik ez du ezer kobratu.

Maddi eta Olaiari zor zaiena ordaindu arte “beren iruzurrak salatzeko” ekintzak egiten jarraituko dutela adierazi du Babes Sareak.

Babes Sarea “bakarrik eta babesgabe sentitzen garen langileok gure autodefentsa antolatzeko tresna” da. Beren iritziz “gatazka laboral hauek, baldintza prekarioak, abusuak... ez dira arazo indibidualak, eta indibidualki ez ditugu konponduko”. Langileak antolatzea funtsezkoa dela uste dute: “Denok langile klasekoak bagara denok batera egin behar diegu aurre arazo hauei. Horregatik Maddi eta Olaiaren gatazka gure gatazka ere bada”.

Ekainaren 30ean LABek, Ernaik eta Babes Sareak kontzentrazioa egin zuten egoera salatzeko.