LAB sindikatuaren kontaketaren arabera, dagoeneko 36 dira aurten Euskal Herrian lan-istripuz hildako langileak.
Abuztuaren 14an gertatu zen ezbeharra, Iurretan. Autonomoa zen langilea. Baso-lanak egiten ari zen beharginak istripua izan zuen, buruan jo zuen makil edo enbor batek, eta bertan zendu zen. LABek oroitarazi duenez, 36 pertsona hil dira aurten lanean ari zirela.
Basogintza-sektorean arriskuak handiak direla ohartarazi du LABek, eta horiek sakonago ikertu eta lan-erritmoak baloratzeko eskaera luzatu. Izan ere, sindikatuaren arabera, makina arriskutsuekin egiten dute lan sektore horretako beharginek, lur malkartsuetan eta, sarri, klimatologiari erreparatu gabe. Baldintzak, oro har, gero eta okerragoak direla adierazi dute oharrean, enpresarien mesedetan: "Onura ekonomikoak langileen osasunaren eta bizitzaren gainetik jartzen dira, baita sektore horretan ere".