Abenduan 1.167 pertsona geratu dira langabezian, baina urte osoko emaitzak kontuan hartuz, 2018an baino 5.156 langabetu gutxiago daude 2019aren amaieran.
147.360 dira 2019 urtearen bukaeran langabetuak. 2018aren bukaeran zeuden 152.516 kopuruaren %3,4 jaitsi da. Euskal Autonomia Erkidegoan 114.162 pertsona daude lanposturik gabe, iazko datuekin alderatuta %4,81 gutxiago, eta Nafarroan berriz, 33.198, iaz baino %1,08 gehiago.
Urte osoan zenbakiek beherako joera izan duten arren, 2019ko abenduak zapore gazi-gozoarekin amaitzea ekarri du. Izan ere, abendua 1.167 langabetu gehiagorekin joan zen, erdia baino gehiago (782) Nafarroan. Orokorrean, Espainiako Estatuko Lan ministerioak jakitera eman duenez, Bizkaian 3.087 langabetu gutxiago daude; Gipuzkoan 1.355; eta Araban 1.070. Nafarroan aldiz, 356 langabetu gehiago utzi ditu 2019. urteak.
Gizarte Segurantzan, datu onak
Gizarte Segurantzari dagokionez, gora egin du Hego Euskal Herriko lau lurraldeetan afiliatuen kopuruak: 980.592 afiliatu daude EAEn, 2018 bukaeran baino 18.488 gehiago. Nafarroan ere goranzko joera izan da nagusi, eta guztira 289.851 afiliatu daude (duela urtebete baino 7.210 gehiago).