Kutxabank “zerbitzu publiko eta gizarte ekintzako” erakunde gisa likidatzen ari direla salatu dute zenbait gizarte eragilek eta sindikatuk.
Aurrezki eta kredituak gizartearen ongizaterako proiektuetan inbertitzeko eta Kutxabanken pribatizazioa atzera botatzeko eskatuko dute EAEko hiriburuetan deitutako mobilizazioetan.
Maiatzaren 6an Bilbon, 13an Gasteizen, eta 20an Donostian, finantza erakundeen izaera soziala garatzeko eskaera kaleratuko dute herritarrek, “Euskal Herrian finantza sistema publikoa, gure aurrezkiak ez ukitu” lemapean.
Eragileen esanetan, Kutxabanken egungo arduradunen asmoa euskal aurrezki kutxek urtetan bildutako aurrezpenak “akziodun eta espekulatzaileen eskuetan” uztea da. Diotenez, horrek dirua etxebizitza eta alokairua bezalako gizarte inbertsioetara bideratzea eragotziko du.