Kutxabankek aurrezki kutxei dagokien Hipoteka Maileguen Erreferentzia Indizea (HMEI) -gazteleraz IRPH bezala ezagutzen dena- ezartzen jarraitzen du, legez kontra. 2013ko azaroan instituzioek interes mota hori desagerraraztea erabaki zutenean Zaragozako Stop Dasahucios eta Kutxabankek negoziazioak hasi zituzten, HMEIak kaltetutakoen hipoteka arazoei irtenbidea emateko. Desjabetzeen aurkako plataformak orotariko irtenbideak proposatu baditu ere, Kutxabankek interes mota hori aplikatzen jarraitzen duela salatu du.
HMEIaren edo Euriborraren interesa eranstearen artean diferentzia nabarmena dago. Kutxek ezarritako interesak urtean 5.000 euroko aparteko gastua eskatzen die kaltetutako familiei.
Noiz arte?
2011n urtebeteko epea eman zitzaion kutxen HMEIa ezartzeari uzteko, interes mota horrek bezeroak larriki kaltetzen zituela ikusita.
2013an, interesaren erabilera oraindik ere ohikoa zela eta, uztailean desagerraraztea adostu zuten instituzioek, epe-mugatzat urte bereko azaroaren lehena ezarrita.
Egun, Kutxabankek bere bezeroei interes hori kobratzen die oraindik, eta praktika horrekin jarraituko duela adierazi dio desjabetzeen aurkako taldeari.
Hori dela eta, Zaragozako Stop Desahucios kolektiboak kanpaina berria jarriko du abian, Kutxabankek berehalakoan HMEIa beste interes mota batengatik ordezkatu dezan.
Kutxen HMEIaren zenbait ezaugarri:
Inposatutako klausulak: Bezeroak negoziatu ezin dituen klausulak dira.
Gardentasunik eza: Bezeroak ez zeuden guztiz informatuta klausula sinatu zutenean. Kasu guztietan Euriborrarekiko abantailadun interes modura aurkeztu zitzaien.
Interes tipo manipulagarria: HMEIa kutxek ezarritako interesen bataz bestekoa eginda kalkulatzen da. Horregatik, bankuen mozkinen arabera erraz manipulatu daitekeen interesa da.
Legez-kontra: Kutxabankek kutxa izateari utzi zion 2012an. Egun bankua denez gero, lege aldetik helduleku are eta gutxiago dauka merkatuan egon ezin den eta soilik kutxek erabil zezaketen interes tipoa aplikatzen jarraitzeak.
Informazio gehiago hemen.