Sua eman diete lau edukiontziri larunbat gauean Villabonako alkate Galder Azkueren etxe aurrean. Astelehenean hasiko dira hondakinak atez ate biltzen herrian, eta Sortuk EAJri lotutako pertsona batzuei egotzi die asteburuko erasoa.
Tolosaldea Txukun taldeko ordezkari Patxi Amantegi eta Patxi Agirreren izenak aipatu ditu Sortuk “gertatutakoaren errudun” bezala.
Joxean Agirre Sortuko Gipuzkoako koordinatzaileak egin ditu adierazpenak, eta “sabotajeaz” hitz egin du. Tentsioa pizteko erasoa atez atekoaren kontra egindako galdeketaren porrotaren ondotik datorrela nabarmendu du.
Sistema berrian hondakinak bereizteko kuboak banatu zituzten Villabonan ostiralean, eta herritar batzuek “alkateari mehatxu” egin ziotela ere nabarmendu dute.
Sortuk EAJri “arduraz jokatzeko eta horrelako erasoei babesik ez emateko eskatu dio”.