Sarek 'Konponbiderako giltzak' manifestua aurkeztu du igandean Gernikan (Bizkaia), euskal gizarteko hainbat eragileren eskutik. Euskal preso, iheslari eta deportatuen afera konpontzea eskatu dute eta indarkeria guztien biktima guztientzat errespetu, babes eta elkartasunaren beharra aldarrikatu. Euskal gizarteari dei egin diete urtarrilaren 13an Bilboko kaleak betetzera, “bizikidetzaren alde aurrera egiten jarraitzeko”.

“Salbuespenak giltzarrapo izaten darrai, etxerako ateak itxita jarraitzen du”, dio dinamika honen baitan aurkeztutako manifestuak. Manifestuaren arabera, oraindik ezin izan dute iraganaren atea behin betiko itxi. Oraindik, euskal presoen eskubideek urratuak izaten jarraitzen dute, “biktima guztiei bidezko tratamendua emateko helburua atzean utziz”. Nahiz eta onartu duten ETAk borroka armatua etetearekin zein euskal presoei ezarritako bakartze eta urruntze politiken amaierarekin “urrats sendoak” eman direla.

Ildo horretan, aspaldian jendartea “elkarbizitzarako ateak irekitzeko lanetan” dabilela ziurtatu dute agerraldian, giltza ugari eskuan hartuta, pertsona eta eragileen arteko harremanak, adostasunak eta desadostasunak “modu eraikitzailean egituratuz”. Horretan berretsi da Sare, eta adierazi du giltzei eraginez jendartearen motorra piztu eta aurrera egin behar dutela. Motorrak kaleetan, esparru politikoan, sindikalean eta sozialean martxan jarriz, “hainbeste urtetako konfrontazioaren ondoren gizarte gisa nahi dugun etorkizunari ateak irekitzeko”. Horretarako “presoen etxerako atea zabalduko duen giltza eskuartean hartzeko beharra” azpimarratu du.

Bilboko kaleak bete

Bego Atxa Sareko eledunaren hitzetan, Espainiako Auzitegi Nazionaleko epaileen eta fiskalen jarrera “espetxe politika justu bat izateko helburutik urrun” dago oraindik. Are, espetxeetako tratamendu batzordeen eta Eusko Jaurlaritzaren irizpideekin talka egiten duela salatu du: “Eusko Jaurlaritzak onartu dituen gradu progresioen % 75i helegitea jarri die Fiskaltzak, eta preso askok itzuli behar izan dute espetxera eta bigarren gradura”. Horrek, maiz, presoei “estres egoera nabarmenak” sorrarazi diela salatu dute.

Manifestuaren sinatzaileen hitzetan, “elkarbizitza oinarri izango duen etorkizuna” eraikitzeko bideari ekin behar dio herriak, urtarrilaren 13an Bilboko kaleak beste behin hartuz: “Bete ditzagun kaleak giltzaz, konponbidearen mesedetan”.