Duela zortzi bat egun, Kolonbiako Hego-mendebaldeko Arrano Beltzak talde paramilitarrak sinatutako mehatxuzko panfleto batean agertu zen bere izena.  Mehatxuak aspalditik datozenez Miller Correak Kolonbiako Gobernuak utzitako babes bereziko ibilgailua erabiltzen zuen. Halere, etxerako bidean zihoala, kotxea geldiarazi, kotxetik atera eta hil egin zuten. Ibilgailua oraindik ez dute aurkitu, eta hilketaren zehaztasunik ez daude argi.

Miller Correa nasa komunitate indigenaren lider ezaguna zen. 2021etik CRIC erakunde indigenaren ACIN-ÇWK lurralde-adarraren Osasun Kontseilaria da, eta Toribio udalerriko zinegotzi eta idazkaria izandakoa da. Correak giza-eskubideak, nasa herriaren eta herri indigenen eskubideak, eta herri indigenak euren hizkuntzak eta kulturak biziberritzeko duten eskubidea eta beharra tinko aldarrikatu dituen buruzagia izan dela azpimarratu du Garabide elkarteak. Correak MAIS (Mugimendu Alternatibo Indigena Soziala) mugimenduko kidea zen. Mugimendu politiko hori Caucako eskualde-hauteskundeetara aurkeztu da, Gustavo Petroren hautagaitzari babesa emateko Kolonbiako presidente izateko bidean.

Garabide Elkartea 2012tik Toribioko udalerrian nasa hizkuntza eta kultura biziberritzeko prozesuan laguntzen ari da, eta harreman horretatik abiatuta, "harro dago Miller Correarekin lan egin izanaz", 2018-2020 aldian Toribioko Nasa Proiektua Bizi Planaren koordinatzaile nagusia izan zenean. "Lider sendoa zen, bere ideia eta konpromisoetan, irekia eta errespetuzkoa, laguntzailea eta langile nekaezina". Garabidek deitoratu du bere hilketa, baita komunitate indigenak, afroak eta nekazariak bizitzen ari diren "hilketa-katea" ere, bereziki Caucan. Kolonbiako Gobernuari eta nazioarteko botereei lan azkar eta eraginkorra eskatu diete "odolustea geldiarazteko". Azpimarratu dute inork ez lukeela hil behar bere lurraldea, komunitatea, hizkuntza eta kultura defendatzeagatik.