Gainera, mobilizazioen aurretik, borrokak partekatzeko topaguneak antolatu dituzte, gizarte-kolektiboen azokekin eta zuzeneko irratsaioekin, kolektiboei egindako elkarrizketekin eta mahai-inguruekin. Iruñean 11:00etan izango da Gaztelu plazan eta Bilbon 12:00etatik aurrera Areatzan.

Irailean 40 kolektibo sozial baino gehiago bildu ziren Ozaetan, Euskal Herriko Eskubide Sozialen Gutunak antolatutako “Su txikien itsasoa” izeneko topaketan. Bertan, Euskal Herriko lurralde ezberdinetan hainbat mugimendu eta kolektibo sozialek egunero garatzen dituzten borrokak batzeko aldarrikapen komunen eraikuntzan aurrera egin zuten. “Borroka horiek guztiak dira beharrezko aldaketa ekosozialaren oinarriak, eta beharrezkoa den alternatiba ekosozial hori elkarrekin bultzatu nahi dugu”, dio Karta Sozialak.

Eragile guzti horien artean eredu ekonomiko, politiko eta sozialaren aldaketaren bide orria adostu zuten, 7 ardatzetan sailkaturik: pertsona guztientzat bizitzeko moduko planeta bat, pertsonak erdigunean jarriko dituen eredu ekonomiko bat eta ez gutxi batzuen onurak lehenesten dituenak, lanaren birbanaketa eta aitortza, subiranotasunen sustapena, pertsona guztientzako eskubideak, gerrari eta gastu militarraren igoerari uko egitea eta plangintza eta parte-hartze demokratikoa.

“Ziur gaude norabide horretan ibiltzeko ezinbestekoa dela gizartea aktibatzea”, eta horregatik antolatu dituzte larunbateko mobilizazioak.