Karidadeko Bentako Am...ona
Karidadeko Benta taldeak eraman zuen txapela Asteasu-Zizurkilera, baina Gipuzkoako bertsozaletasunak irabazi du Herriartekoa.
Otsailean hasitako bideak maiatzaren 27an izan zuen bukaera Azpeitiko Izarraitz pilotalekuan. Gipuzkoako Herriartekoan 38 taldek hartu dute parte eta 54 saio jokatu dira. 270 parte hartzaile bertsolariak, epaileak, gai-jartzaileak eta ordezkariak kontatuta. Gehitu horri otorduetan laguntzen aritu direnak, argazkiak edo grabazioak egin dituztenak eta bertsozaleak, badira batzu-batzuk.
Tolosaldeako bi talde finalean: Amasa-Villabonako Am...ona eta Asteasu-Zizurkilgo Karidadeko Benta. Unai Mendizabal, Joseba Otaegi eta Haritz Mujika bertsolariek eman zioten garaipena Karidadeko Bentari. Am…ona taldean berriz, Beñat Iguaran, Oihana Iguaran eta Ander Goikoetxea aritu ziren kantuan.
“Herriartekoak asko izan du eta du oraindik jolasetik” esanez hasi zuen saioa Igotz Alkorta gai-jartzaileak. Hasierako agur jolastietan nabarmen geratu zen bertsolariek elkarren berri ongi aski zekitela eta ederki sartu zieten ziria elkarri. Bi taldeek Amaia Agirre bertsolaria ekarri nahi izan zuten gogora, euren bertso eskolako irakasle izana umetatik eta bertsolari-taldekide Am…onan.
Azkar berotu ziren Izarraitz pilotalekuko 13 koadroak, erremintako frontoia izaki, hitzak, puntuak eta errimak zorroztuta ekin zioten lanari sei bertsolariek. Txapelketako ohiko ariketekin hasieran eta plazetan ikusten ditugun ariketa bereziekin jarraian. Seguidillan aritu ziren Otaegi eta Goikoetxea jende artera jaitsita eta horrek publikoa ere urduri jarri zuen, eurei kantatuko ote zieten beldurrez. Gaia emanda atzekoei abesten ere jarri zituzten eta talde batek besteari erantzun behar izan zion. Eztarria freskatzeko botiletako urak ederki bukatuta iritsi zen kartzelako ariketa: kopletakoa. Umeak negarrez hasi eta saioa pilotaleku kanpoan erdizka entzun behar izan zuten gurasoen paperean jarrita.
Karidadeko Bentak irabazi zuela iragarri zuen Gurutze Oiartzabal aurkezleak eta gustura txalotu zuen publikoak erabakia. Bertsolarien arteko besarkadetan ikusi zen denen txapela zela. Karidadeko Bentakoa, Am…onarena eta Harituz Tolosaldeako Bertsozale Taldearena. Argitzeko geratu zen ea Mendizabalen, Otaegiren eta Mujikaren bustorik jarriko ote duten Asteasu-Zizurkilen, baina Otañok eta Errotak badituzte ondorengoak. Herriartekoan parte hartu duten taldeetako ordezkariak ere igo ziren oholtzara. Guztiei egurrezko mikrofono bana oparitu zieten oroigarri gisa. Erratzaren aurrean kantatu beharrik ez da izango beraz, hemendik aurrera Gipuzkoako bertso eskoletan.
Urtarrilaren 25ean ospatuko dute bertsozaleek urteroko hitzordua. Honakoa Bortzirietako Bertso Eskolak eta Bertsozale Elkarteak antolatuko dute elkarlanean. Goizeko 10:00etan ibilbide bat eginez hasiko da, arratsaldean XXI mende 25 (H)ilbeltz izenburua jarri dioten bertso... [+]
Astearte goizean aurkeztu dute Gipuzkoako Bertsolari Txapelketako finala, Illunben (Donostia) bertan. Larunbatean, abenduaren 14an, izango da saioa, 17:00etatik aurrera.
Gutxi ateratzen naiz azken urteetan. Askotan esan dut, badakit, baina badaezpada ere. Bertso saio batera joan naiz gaur. “Bejondeizula”. Bai, horregatik abisatu dut gutxi ateratzen naizela, pentsatzen dut zuek kultur ekitaldi askotara joaten zaretela, eta... [+]
19 urte ditu Maddik, Matematika Gradua ikasten ari da Leioan, EHUko Zientzia eta Teknologia fakultatean, musika ikasketak eginak ditu, eta gazteagatik ere, bertsolari iaioa da. Eta bertsolari ona baino hobea izateko zumitzak ditu, bateko eta besteko plazetan ikusi dugunez... [+]
Musika ondare tradizionala “berreskuratu, zaindu eta transmititzeagatik” irabazi du Eusko Ikaskuntzaren 2024ko saria Beltranek. Urte luzeetako “dibulgazio lan multidimensionala” aitortu nahi izan dio epaimahaiak.
