Apirilaren 26ko 12:30ean hasiko da saio berezia, Baigorriko hitzorduaren antolatzaile den Basaizea elkarteak jakinarazi duenez. Bertsolariak, dantzariak, gaiteroak, hots, Nafarroaren Egunaren osagai garrantzitsu batzuek beteko dute hitzordua.
Hitzordua luzatu du Basaizea elkarteak: apirilaren 26ko 12:30ean sartu Kanalduderen webgunera, Nafarroaren Eguna kari. Koronabirusari aurre egiteko konfinamendua dela eta, ezeztatu behar izan den hamaikagarren ekimena da Nafarroaren Eguna, urtero, apirileko azken igandean Baigorrin finkaturiko hitzordua. Hala eta guztiz ere, momentua markatuko dute saio berezia eskainiz Kanalduderen webgunean. Egitaraua: bertsolariak, elkarrizketak baita Larrain Dantza ere, antolatzaileek zehaztu dutenez. 13:00etan eskainiko dute Larrain Dantza Baigorriko dantzari eta gaiteroek.
1979. urtean hasi ziren Nafarroaren Eguna ospatzen.