Hasiera emateko hamarnaka preso ohi eta herritar gerturatu ziren Usurbilgo plazan egin zen ekitaldira. Bertan egongo da gune nagusia, Kaleragunea, eta preso ohiek osatutako talde batek egunero lo egingo duen lekua. 300 lagunetik gora dira guztira izena eman dutenak. “Preso ohiok ez gara etxean geldituko, kalera irtengo gara borrokan jarraitzera”, azaldu zuten aurkezle aritu ziren Maitane Sagastume eta Juanjo Legorburu preso ohiek.

Aurkezpenean azaldu zutenez “euskal preso, iheslari eta deportatu politikoen aldeko konpromiso, elkartasun eta borroka gunea” izango da Usurbilgo plaza datorren egunetan. Bakea lortu ahal izateko askatasunean sakontzeko beharra azpimarratu zuten.

Antolatzaileen esanetan EPPK-k abiatuko duen eztabaida sozializatzeko lekua izango da ekimena. Kolektiboak irailean aurreratu zuen presoen auzia aztertzeko eztabaida abiatuko zuela eta hori bultzatzeko egingo duten ekimenetako bat da.

“Askatasunaren sua” egongo da piztuta Kaleraguneak iraun bitartean. Zigor Medorio preso ohiak eginiko eskulturan kokaturik dago eta 355 zenbakia darama, euskal preso politikoen kopurua.

Kaleragunetik haratago

Euskal Herri osoan ere mobilizazioak, espetxeetara martxak, ekitaldi kulturalak eta mendi martxak antolatuko dituzte hilabete osoan zehar. Preso ohiez osatutako harreman talde bat eratuko dute eragile sozial eta politiko ugarirekin bildu eta gaiaren inguruan lan egiteko. Elkarrizketen helburuak preso, iheslari eta deportatu politikoen egoera zein den azaldu eta konponbidearen bidean aurrerapausoak ematea dira.

Ekitaldiari hasiera eman zitzaion egun berean, Giza Eskubideen Nazioarteko Eguna izanik, Etxerat elkarteak dispertsioaren amaiera eskatzeko giza kateak antolatu zituen Gasteiz, Iruñea eta Baionan.