Astelehenetik igandera, “auzoa eta eremu publikoa denonak direla” aldarrikatuko ditu jai herrikoi autogestionatuak. 50 jarduera baino gehiago antolatu dituzte auzoko bizilagun, taberna, saltoki eta eragileek.
Auzo harrotasuna, parte hartzea eta autogestioa oinarri dituen Gasteizko Alde Zaharreko jai herrikoiak hamahirugarren edizioa du aurtengoa. Astelehenean txupinazoak emango dio hasiera ofiziala jaiari. Aurten jaio diren bi eragilebotako dute txupina: Auzoan Bizi etxebizitza sareak, eta Herrizoma elikadura sareak. Antolatzaileek urtarrilaren 3ko Aldarrikapen Jolasa eta auzo bazkaria, eta igandeko destxupineko zirkoa nabarmendu dituzte aurtengo egitarautik. Horrez gain eta urtero legez, izango dira kontzertuak, hitzaldiak, umeentzako eta agurrentzako jarduerak, antzerkia, dantza...
Auzotik auzoarentzako
“Alde Zaharreko kolektibo, bizilagun, tabernari eta komertzioei esker antolatzen dira jai hauek, eta aurten ere halaxe izan da. Urtebete luze eman du jendeak etxean sartuta, eta jaien helburu nagusia jendea kalean elkartzea izango da”, azaldu dute antolatzaileek. Auzoa eta kaleak denonak direla aldarrikatuko dute aurten ere. Auzotasunaren indarra azpimarratu nahi du aurtengo leloak: Etxean intxaurrak hiru, auzora atera eta hamahiru.
