Alerta guztiak piztu dira Europako errefuxiatu-kanpalekurik handienean: COVID-19an positibo eman du Moriako kanpalekuan (Grezia) bizi den pertsona batek, eta kanpalekua ez dago prestatuta birusaren zabaltzeari aurre egiteko: 3.000 lagunentzako leku batean 13.000 errefuxiatu bizi dira pilatuta, eta distantziak mantentzea ezinezkoa da.
Positibo eman duen gizonak abuztuaren 17tik darama Morian (Lesbos irlan kokatua), eta kezka agerikoa da bertan bizi diren herritarren artean, egoera oso larria baita: pilatuta bizi dira errefuxiatuak, hondakinak egunetik egunera metatzen dira eta osasun zerbitzuak jasotzeko aukera urria dute. “Pertsonen arteko distantzia mantentzea ezinezkoa da, gauero kanpadenda beste hamar lagunekin edo gehiagorekin eta komunak ehunka pertsonarekin partekatu behar dituzun leku batean”, adierazi du Zaporeak gobernuz kanpoko erakundeak.
Argi dago kanpalekua ez dagoela prestatuta pandemiari aurre egiteko, baina Zaporeakeko boluntarioek azpimarratu nahi izan dute aurreikusi zitekeela birusa iritsiko zela Moriara, irlan eta Grezian orokorren azken asteotan kasuek gora nola egin duten ikusita.