Beasaingo Jazpana Fest jaialdiak egitarau oparoa prestatu du aurten ere. “Izen handiak, gorantz doazen talde gazteak eta banda mitikoak” izango dira jaialdian ostiral eta larunbatean, antolatzaileek nabarmendu dutenez.
Krisiak zailago bilakatu badu ere, “oso pozik” daudela adierazi dute antolatzaileek, jarduera guztiak mantendu eta “musika talde indartsuak” lortu baitituzte. Antolatzaileen “ametsa” Lisabok parte hartzea zen eta lortu dute.
Ostiralean, Erroma, No More Lies, Muturbeltz eta Lisabo arituko dira Bernedoenea aparkalekuan. Ondoren Busbu disko jartzailea arituko da.
Larunbaterako “gau magikoa” prestatu dute, ordu aldaketak ordu bat gehiagoz gozatzeko aukera eman dielako. Cuarto de Hora, Sumision City Blues, Belako, Aliment (Katalunia), Estereotypo, Bigott (Kantabria, Espainia) eta Obits (AEB) izango dira protagonistak.
Bestalde, talde berriek jotzeko aukera eman nahi izan dute. Tarte horretan arituko da Wilhelm & The Dancing Animals talde. “Etorkizun ona zeukatelakoan ireki genizkien jaialdiko ateak, eta errealitate bihurturik datoz”, adierazi dute antolatzaileek.
Jaialdiari amaiera Mether & Zacker disko jartzaile kataluniarrak emango dio.