Europan, ikastetxe itunduen tasarik altuenetakoa EAEko hezkuntza sistemak duela eta azken egunetako hainbat ikerketaren arabera Espainiako Estatuan jatorriagatik ikasleak gehien segregatzen dituena dela nabarmendu du sindikatuak.

Hainbat “tresna, trikimailu edota mekanismo” erabiliz, “alfonbra gorria ipintzen diote eskola pribatuari”. Adibidez, sindikatuaren hitzetan, “ohiko bihurtu da ikastetxe pribatuek administrazioak etapa batean baimendutako gela kopurua baino gehiago planifikatzea eta Lakuako ikastetxeen zuzendaritzatik ituntzen bukatzea lege-esparrutik kanpo. Baimendutakoak baino ikasle gehiagoren matrikulazioa onartzea dakar horrek. Hori guztia hezkuntza administrazioaren oniritziarekin. Hori horrela gertatzen ari dela baieztatzen duten dozenaka kasu daude EAEn, eta STEILASek auzitara eraman du horietako bat”.

“Gurasoen eskola hautatze sasi-askatasunean oinarrituta”, pribatizazio prozesua Haur Hezkuntzan hasten dela dio. “Kasu askotan, auzoko, herriko... haurreskola publikoan plaza hutsak dauden bitartean diru-laguntza publikoak ematen zaizkio alboan dagoen eskola pribatuari, zerbitzua bikoiztuz, garestituz eta alferrikako soberakina eraginez”.

Prozesuak gailurra jotzen du unibertsitatean: “Ondo hornitutako EHU indartsua izan beharrean, nahitaezkoak beharko luketen baliabideez hornitu beharrean, EAJko agintariek –PSEren oniritziarekin– Euskal Ekosistema Unibertsitarioa asmatu dute unibertsitate publiko eta pribatuen arteko trataera berdintzeko”.

Gasteizen diru publikoz babestuta irailetik aurrera martxan jarriko duten Euneiz unibertsitate pribatu polemikoa ere aipatu du sindikatuak.

"Hezkuntza publikoa lehenetsi. Pribatizazioari ez!" lelopean manifestazioa egin dute Lakuan.