Jaume Sastre irakasleak gose greba utzi du. Balear Uharteetan katalanezko hezkuntza kalitatezkoaren aldeko borrokan 40 egunez itsasoko ura baizik hartu gabe egon ostean, astelehen arratsaldean eten du bere protesta baketsua.
Joan den asteburuan mila lekutatik iritsiak zitzaizkion Llucmajorreko errientari greba eten zezan eskariak, aski urrun iritsia zela borrokan eta orain gizarteak hartuko zuela lekukoa.
Bartzelonan, Elxen eta beste lekuetan katalanezko hezkuntzaren alde burututako manifestazioetan ere omendua zuten Sastreren ahalegina. Atzo, medikuek ohartarazi ostean osasuna arriskuan jartzeko puntura iritsia zela, lagunek eta sostengu taldekoek erregutu zioten utzi zezala baraualdia.
Ara egunkariak egin dion elkarrizketaren bideoan adierazten dute lagunek: "Jaume Sastre konbentzitu dugu gose greba utzi dezan, daramagun borrokan bere behar handia daukagulako". Babesleek Sastreri Twitterren kudeatzen dioten @vagadefam kontuan irakur daitezke Herrialde Katalanetako zoko guztietatik irakasleari bidalitako animo eta eskarizko mezuak.
Sastrek indarberritzeko beharko duen lehenbiziko astea emango du greba egin duen Casa Llarga gune publiko berean, sostengu taldeak prentsaurrekoan azaldu duenez.
Gehitu dute gose greba uzteko eskatzearekin batera maisu zaharrari agindu diotela are gehiago indartu dutela katalanezko eskolaren aldeko borroka. Gatazka piztu da Baleareetako lehendakari Jose Ramon Bauza (PP) bere agintealdiaren lehentasuntzat jarri duenean hango hezkuntza sisteman katalanaren garrantzia urtzea gaztelaniaren eta ingelesaren artean.